Tawng Upa leh Thufing: Hmanlai Mizo Nun

Mizo khawtlang nun inrelbawn dan hi mumal leh felfai takin a kal a, kawng hrang hranga inzirtirna leh inenkawlna kawngah hnam dang lakah pawh kan duai lo hle. Kan pi pute kha an khawsak phung mawlmang viau mah se an nunah khan thil tam tak zirtur leh hmuh tur kan nei a ni. An khawtlang nuna upa zawk leh chinchang hriate zirtirna kha an vawng \ha em em a, mi dang mit khama awm kha an hlau hle \hin.

Kum sawm leh pathum zet Mizorama Bawrhsap hna thawka awm AG McCall chuan, “Hetiang khawpa nun \ha leh ropui, hetiang hnam mawlin an rawn pu chhuak thei hi an hmanlai nun hun engemawti lai vel khan hnam ropui zawk, China ang zingahte an khawsa tawh a ni ang e” (quoted in Laisuih, 97) a ti hial a ni. Chutianga hnam inrelbawlna \ha tak nei kan nihna hi a ropui a, an hmun pawimawh Zawlbuk leh ramchhuah vahna hmunah te an inhrilh a, chhungkuaah pa berin a fate a chah chamchi a, chu chuan nun \ha leh mawi a rawn pian tir a ni. Zawlbuk hi pi pute hmun pawimawh leh naupang a\anga tlangval thlenga nun an zirna hmun, pi pute chanchin an hriatna leh awmdan mawi an zirna hmun pawimawh tak a ni.

Zawlbuk leh inchhungkhurah nu leh pate’n an fate hnenah pi pu atanga an lo dawn thufing leh \awng upa te hi an hrilh fo a, chung dan mawi leh \ha pela khawsak chu mitin duh loh a ni. Heng \awng upa leh thufing a\ang hian Mizo khawtlang nun i lo bihchiang teh ang.

1. Ei leh bar zawnna kawng:

            Hmanlai a\anga kan eizawnna pui ber chu lo neih a ni a, tunlai hunah pawh thingtlang hmun tam takah chuan lo neih hi eizawnna pawimawh ber a la ni reng a ni. Hmalaia tlawhma lak kawnga an inzirtirna pawimawh hmasa ber chu, “Tlawhhma lakin hniak tamna lam apiang bawh tur” tih hi a ni. Hei hi a chhan ber chu an khawtlang nun ral muang lo kha a ni. Khua leh khua inrun leh indo reng an nih avang leh sa hlauhawm an tam avangin fal taka lo neih chu an duh ngai lo a ni. Ral leh sa hlauawm thuah pawh inauh zung zung theihna atan te, lawm neih pawha kal ho dial dial theihna tur kawng chu an tan a pawimawh a, chuvangin hniak tamna lam chu bawh ve zel turin an inzirtir \hin.

            Mizo pi pute kha an khaw hmun chhuahsana an pem pawhin an hna hmasa chu in leh lo din a ni a, ‘in leh lo’ tih hi an thu pawimawh a ni a, chenna in dawtah lo chu an hmabak hmasa ber a ni \hin. Kan \awng upaah pawh upat lam sawi nan ‘tuha kuai rual’ tih te, ‘ram \ang rual’ tih te kan nei bawk. Heng bakah kum lam sawi nana an hman ber paw ‘chumi khami neih kumah chuan i piang’ tih te chu an kum leh pian kum sawina ve ber a ni \hin. Heng hian kan pi pute nuna thawhhma zawn pawimawh zia a tarlang chiang viau a ni.

            Lo an neihna hmun tur hi an thlang uluk thei hle bawk. Kan pi pute kha an hun tawn tawh atangin an inzir nasa hle a, an lo leh a vela thil awmte a zirin lo neih leh huna hmun \ha leh \ha lo te an thliar \hin. Leiruang\huam te, sih te, thinglubul te awmna hmunah te lo an nei ngai lo. Hei hian an nunah nghawng a neih \hin avangin bu leh balah te an tluang lovin an ngai a, an duh ngai lo. Tin, ram \ha sawina atan ‘buh hnah a lang’ tih an hmang \hin bawk a, ram \ha, a lei lung a\anga buh \hatna tura an ngaih sawina a ni.

            Lo vah hi mipa hna bik a ni a, an dinhmuna hlauhawmin thing tlu palh leh mau zum invaw vela kara leng an nih avangin an dinhmuna a hlauhawm hle. Chuvangin ‘mipa lo vat leh hmeichhe nau vei chu hlang chunga chuang ang an ni’ ti hialin an sawi \hin. Hei hian an dinhmun hlauhawmzia a tarlang chiang hle.

            Thlawhma chungchang hi Mizo pa titi tam ber a ni a, thlawhma sawina lam \awng upa pawh kan nei nual a; chung zingah chuan ‘thawhhma sawi’ tih te, chu chu thil pehhel nei lova sawi tihna a ni a, thusawi bawrh bawrh kam tehkhinna a ni. Tin, ‘thawhloh bapui ang’ tih te pawh kan nei bawk a, hei hi thil mum lam chi nisi ther heng huang sawina a ni. An thlawhmaa ba hmun thlawhfai loha an ba thar chu lian mang si lovin a zung siper a awm \euh \hin a, chutiang tehkhin an chuan an hmang \hin bawk.

            Tin, thianglo leh an duh ngai loh chu buh par laia thlama chakai rawh a ni. Buh vui hnuah a rah siam turin a lo par a. Chutia a par lai chuan thlamah chakai rawh ta se, a rawh rim leng vel khan buh kha vui thei lovin a ti ro \hin, chuvangin upa ten an duh lova, ‘buh par laiin thlamah chakai an rawh ngai lo’ tih thu an inzirtir \hin.

2. Ramchhuah leh rammut

            Kan pi leh pute kha sa pela ramchhuah an ching viau a, kut urna tur leh favang awllen lai ten ramchhuakin \hianho te an ramchhuak fo \hin a. Chung an chhuah ni khua chuan val upa emaw an zinga upa deuh thu leh hla an ngaichang thiam a, an zah em em \hin. Chung zinga mi huaisen leh sa kap thei deuhte chu ‘ram vachal’ tiin an sawi \hin nghe nghe. Tin, ral beia zan riaka an thawhchhuah chang a awm \hin avangin chung mite chu “rammu” an ti \hin bawk a, an dinhmun a hlauhawm em avangin tehkhinna \awngkamah pawh ‘ral kara ring rawl’ tih te an sawi \hin a. Thih ngama thawk chhuak, mi huaisen, thi mai thei dinhmuna ding te sawina a ni.

            Heng an ramchhuah nikhua hian zawm tur an ngah em em a, pi pu a\anga thianglo a an ngaih thil te an hnualsuat ngai lo a ni. Aia upa zawkte zai an ngai a, chaw ei pawhin “Aia upate aiin thleng tlang an vuan hmasa ngai lo” tih te chu an inzirtitna pawimawh tak a ni a, aia upa zawkte chaw bar hmain an bar hmasa ngam ngai lo a ni. Chu chuan upa zawkte an zahthiam zia leh an dah chungnun zia a tarlang chiang hle. Tin, “Ramah chaw eibang an paih ngai lo” an ti bawk \hin, hei hi an chin hriat a nih loh avang leh chaw hi thil zahawm taka an ngaih avang a ni.

            Sa beih nikhua pawhin thil tam tak an inzirtir \hin a. ‘Sapui zimna hmunah chaw an fun ngai lo tih te, Sapui zimnaah thing lerah an lawn ngai lo’ tih te an inzirtir \hin. Heng hian chhan an neih vek avangin an hnualsuat mai ngai lo. An thu laimu ‘\hian chhan thih ngam’ tih hi heng rammut leh sapui beih ni hian an ngaipawimawh zual hle a. “Sapui hmaa \hiante chhan ngam lo chuan pawnfen feng rawh se” ti hialin an sawi \hin. Mahni \hiante ral leh sa hmaa chhan ngam lova tlanchhiat sante chu an hmusit a, hmeichhia ang maiin an ngai \hin. Chuvangin ramchhuakte reng rengin an \hiante chu eng dinhmunah pawh dingse an theihtawpin an puih \hin. |awng upaah pawh ‘sakawlin a hmul a thlau ngai lo’ tih kan nei a, hei hi a awmzia chu mi huaisen leh pasal\ha an nih chuan engmah dawizep avanga tlanchhiatsan nei ngai lo sawina a ni. Heta sakawl hi sakei sawina a ni a, sakei hian a hmul a thlauh ngai loh avangin hetiang \awngkau chheh hi an lo hmang ta a ni. Tin, \hian \ha tak sawina \awngkamah pawh ‘sakei mei vial pui’ tih  kan nei bawk a. Sakeiin mi a seh a, a mei lo vial phakna khawpa lo chhantu chu \hian \ha tak anih avangin in\hian \ha sawi nan an hmang \hin. Sakei hi sa serh deuha an neih avangin ‘Sakei kawng kan an bih zui ngai lo’ tih te, ‘Sakei in sa awk a lakin chhuhsak an tum ngai lo’ tih te chu an inzirtirna pawimawh tak a ni bawk.

            Pi pute thufing pkhatah chuan ‘mikawlh sakawlhin pasal\ha a puangzar a, \ampui mithiin unau laina a kaichhuak’ an ti \hin. Hei hi a chhan ber chu harsatna leh manganna kan tawn hian min lainattu leh hmangaihtu an lo lang \hin tihna a ni. Ral leh sa hlauhawm a wm loh chuan pasal\ha huaisen a hriat theih loh \hin avangin ral hlauhawm a awm hian mi huaisen an lo lang chhuak \hin a ni.

            Ral an beihna hmunah hian mi an that a, an lu chu an tana an hawn \hin. Chung chu an khua an thlenin an ai ta \hin a ni. Mahse hetiang nikhuaa an inzirtirna pawimawh tak chu “Ral beihna hmunah nunau chungah kut an thlak ngai lo” tih hi a ni. Nunau hi naupang leh hmeichhia te, tar chak tawh lo te sawina a ni ber a, heng mite sawi sak leh thah hi an duh ngai lo.

3. Chhungkaw Nun leh |henawm Khawveng

            Inchhungkhur hi hmanlai pi pute inzirtirna hmun pawimawh tak a ni a, hei hi tunali hun thleng pawha kan la chin a ni. Chhungkuaah hian inzirtirna hi bul\an tur a ni a, nu leh paten an fate hnenah awmdan \ha leh mawi te, nunphung dik leh dik lo an hrilh \hin. Chaw ei lai hi chhungkaw inzilh hun leh nu leh paten an fate an zilh hun ber a nih avangin “Chaw ei laiin mi inah an leng ngai lo” tih te an inzirtir \hin. Thu chhia leh \ha, chhungkaw thuphung sawina hmun \ha ber a nih avangin intibuai an duh ngai lo a ni. Tin, an len chhuahin ‘mi inah thawm nei hmasa lovin an lut tlang ngai lo’ bawk a, hei hi chhungkaw titi emaw thu pawimmawh sawi lai te a nih theih avangin an ngai pawimawh hle.

            Nu leh pate hi chhungkaw enkawltu an nih angin an zahthiam em em a, an fate’n nupui pasal neuitawh mah se nu leh pa ber te chu an zah em em \hin. “Nu leh pa pawisa lo chu an dingchhuak ngai lo” tih thufing kan nei a, “Nu leh pa mawl biak chu tiang lo a ni” tihte pawh zirtirna thu kan nei bawk. Chuvangin Mizo khawtlang nuna chhungkuaah nu leh pate hian dinhmun sang tak an chelh a, an thu leh hla an ngaipawimawh hle \hin.

            Nu leh pate mizia leh nunphung hi an faten an zui duh hle a, nu leh pa \ha tak chuan fa \ha leh fel an hring a, chutiang bawkin nu leh pa \ha lo chu an fate pawh an \ha lo fo \hin. Chung chu kan pi pute khan hre rengin “Sial rangin sial rang a hring a, sakawlin sakawl a hring” an lo ti \hin. Nupui pasal inzawn kawngah pawh hei hi an chhui zui nasa hla \hin, an thlahtute a\angin kutkem nei te, mi awm \ha duh lo te an nih chuan an hnualsuat mai \hin. An chhungkaw lo chawr chhuahna chuan an dinhmun thui tak a hril avangin chhungkua kha an dah pawimawh hle.

            “|henawm do aiin khaw sarih do a thlanawm zawk” tih hi an nuna thil pawimawh tak a ni. |henawmte hi Mizo nunphungah chuan an pawimawh em em a, chhiatni \hatni thilah te damloh thil thuah te thlamuantu leh engkim an inbanna a ni \hin. Ei leh bar chungchang thuah pawh khaw dang khaw sarih zet, kan tana \ankaina tur pawh nei lo, dap theih miah loh te ai chuan \henawm hnaite an pawimawh zawk zia tarlanna a ni.

            ‘Mipa-in miu a vel ngai lo’ tih te ‘Nu leh nu insual pa-in a \helh ngai lo’ tih te, “Hmeichhe vau loh leh vau hlim loh chu an pawng tual tual’ tih te hian Mizo chhungkua mipa chungnun zia a tarlang chiang hle. Mipa chu engkima a thunei ber leh chhungkaw khai dingtu a ni a, a tihtur awmchinah chuan huaisen takin thila ti tur a ni tih kha an innghahna a ni ber. “Pumah hmeichhia an lal a, tuikhurah mipa” tih thu te pawh hi tuichawi hi mipa hna a ni ngai lova, mah se chhungkaw khawsaka hmeichhe damloh leh awm loh avanga miap tuikhura a kal tawh chuan an hmasak tur ber \hin. Chutiang bawkin pumah pawh hmeichhia an kal ngai lova, eng emaw avanga hmeichhia an lan ve chuan an siam sak hmasa ber \hin. Chuatiang khawpa inrelbawlna \ha chu kan pi pute khan an lo nei vek a, an dinhmun leh tih tur \heuh kha tih an tum hram hram \hin.

4. Nun phung dik

            Nun phung dik inzirtirna kawng hi a hmasa lamah kan sawi tawh zingah khan tam tak awm mah se khang baka khawtlang nunphung dik leh \ha an inzirtirna kawng hrang hrang te lo tlir leh ila. Kan pi pute thufing leh an inzirtirna laimu ber chu nun phung dik inkawhhmuhna hi a ni.

            An phak tawk leh tlin tawkah mihring nun hi an thlir a, chutah chuan kawng dik zirtirna an vawrh chhuak \hin. Miin thu neihna a neih ve tak thut avanga mi dang vengthawng hlek lova a invei vung chu \ha an ti lova, mahse, chutiang mi chu an lo awm \hin avangin “Lal ngai lo lal a na, an lal a kha” tih thufing te an nei a. Mahni infak hluam chu thil \angkai lo leh engmah an nih lohzia tarlanna mai a nihna tih lan nan “Mahni infak leh sakhi ngalah engmah a bet lo” te an lo ti a. Heng hian nun kawng duk leh \haah a hruai thui hle.

            Tu te mai pawh hi inmawh tawn thei vek kan nih avangin “Lampui changkhatah mi an be chhe ngai lo” tiin an lo inzirtir \hin a. Khawi lo chhuahna hmunah tupawh tawkin engthil pawh min zawt se mawi tak leh hawihawm taka lo chhan chu mi puirling zia a nih zia kha an inzirtir nasa hle a ni. Rethei leh hausa pawh engkawngah emaw chuan in mamawh tawn thei vek kan nih zia tarlanna “Lungpui pawh lungtein a kam ki loh chuan a awm thei lo” tih thufing pawh hi ngaihtuah zui tham a ni. Khaw tinin lal an nei a, lal upa leh tlema thil tithei deuh an awm bawk a, chung mite zawng zawng chu inmamawh tawn vek an ni a, lal awmna chhan pawh rethei tak tak chhungkua te vang a ni a, chung mi rethei ho tan chuan lal an awm ve bawk. Chung avang chuan mihring hi in mamawh tawn vek kan ni a, in endawng mai thei kan ni lo tih hi heng hian a tichiang hle.

            “Sem sem dam dam, ei bil thi thi” tih thu te hian mi dangte tana inpekna ropui zia a tarlang chiang hle. Engkim an neih chu in\awm dial dialin, a nei lote hnenah pe a, midang \anpui chu an thupui laimu a ni a, mi harsa leh hmeithaite an endawng ngai lo a, an theuhtawkin an \anpui \hin. “Kawng lakah chau \anpui zel rawh” tih thufing hian kan pi pute khawtlang nunah hmun pawimawh tak a luah bawk. Lo neia eizawng, ram hla tak tak vata tuk tina feh \hin an ni a, kawngah hmeichhia leh tar chak lo te, chau deuh te an awmin an pel tawp ngai lova, an \anpui ngei ngei \hin. Chu chuan an khawtlang nun  kha a tinuam a, \anpuitu leh a \anpuia te tan a nuam bawk \hin.

            Piangsual te hmusit a, nuihsawh mai mai hi kan pi pute thil duh loh ber a ni. “Piangsual nuihsan suh, piansual leh pharin tlai luat a nei lo” tih thufing te hi hnam pui zawk te pawn an nei pha lo hial ang. Mihring dinhmun hi inthlak thut thei leh eng emaw avanga piansual dinhmuna ding mai thei kan nih hre rengin kan pi puite khan puangsualte chu an lainat a, nuihsawh an duh ngai lo. Mihring hi piangsual a, chan chhe zawk chang mai thei kan nih avangin kawng dik an inzirtir hram hram \hin.

            Hetiang khawpa zirtirna kawng leh puithuna kawnga zirtirna \ha te, \awng upa awmze nei tak tak kan nei hi kan hnam puitlinzia lanna pakhat chu a ni ngei mai. Kan pi pute nun kha tunlai huna kristian zirtirna nen pawh hian a inhlat lo hle. An \awngkau chheh leh thufing te hian tunlai hun thlengin awmzia a la nei a, mihring awm chhung chuan kan la mamawh zel tur an ni. Literature \ha tehna pakhat chu awmze kumhlun a neihna (universal truth) hi a ni a, khawi hmunah pawh, eng hunah pawh nise thudik leh mawi, mi dangte pawhin an mawmawh hringnun lanna thu leh hla hi kan pi pute nunah khan a intuh a ni. Chuvangin heng kan \awng upa leh thufingte hi hluta, vawn nun zel hi thil pawimawh tak a ni.