CHANCHIN THAIN MIZO KHAWTLANG NUN A TIH DANGLAM DAN

 Thuhmahruai:

Zofate hian kan pi pute a\anga kan nun phung tam tak kan kal san mek a, chhunzawm kan nei nual bawk a. Khawvel hmasawnna mil a nih rualin a hlawm lian ber erawh chanchin \ha (kristianna) avanga inthlak hi a ni awm e. Hnam nun phung inthlak hian \hatna leh \hat thawk lohna tam tak nei mah se Mizo hnam nun inthlakthleng zel erawh thil lawmawm tak a nihna chin a tam awm e. Hei hi chanchin \ha zar kan zo tih loh phal chi a ni hauh lovang. 

Pu Buanga & Sap Upa

Sakhaw kawngkal hian hnam nunah nghawng lian tak a nei thei a, sakhua hian kan rilru sukthlek leh nunphung a nghawng lian hle. Mipui nunphung hi hnam ze mila kal a ni a, hnam zia hi sakhaw kalphungah a innghat thui hle tih kan hmu thei ang. Hmanlai Mizo pi pute sakhaw vawrtawp chu pialral a ni a, chu kawng chuan nitin an nun a nghawng a; sakhaw serh leh sang an ngaihpawimawhna kha tunlai khawvel a\anga thlir chuan a nun ticheptu lian tak a ni. Mahse chu serh leh sang tel lohna chu nun ruak leh vanduainaah an ngai thung. Thiang leh thiang lo khawvel kha an nun khalhtu lian tak a nih avangin kawng dik zawk nia an ngaih kawng chu upa zawk emaw chinchang hriate ngaidan ramah a innghat lian hle bawk. Chutiang khawvel a\anga Mizo khawtlang nun sawi danglam dawrhtu langsar ber chu kristian sakhua kha a ni.

Kristiannain kan khawtlang nun a a sawi danglamna hi thlir dan hrang hrang a awm thei a, kawng thim zawnga thlir chuan a \hat lohna mual tam tak pawh awmthei a nih laiin tun dinhmuna kan thlen chinah chuan chanchin \ha hi kan hnam vanneihna kawng rahbi pawimawh tak a ni. Tun dinhmuna Mizo nun kan thlir chuan “Mizo culture leh kristianna hi a inrem chauh a ni lova, Mizo culture-ah hian kristianna hi a lar ber a ni”[1] tih theih hial a lo nita. Kristiannain kawng hrang hranga Mizo khawtlang nun a tih danglamna i lo thlir teh ang. 

1. Sakhaw kalphung leh rinna:

            Chanchin \ha kan dawn hmaa Mizo sakhaw kawngkal kha a hautak hle. Sakhua leh chi kha kalkawp tlat a nih avangin a huam chin a zim a, a kalkawng pawh a kherhkhiap hle. Chhungkaw tinin mahni zawn \heuhah urhsun leh mumal taka an kalpui a ngai a, an khawsak phung leh ei bar zawnna milin an thlenchin a inthlau thei hle thung. Khuangchawi pa dinhmun chu an dam laia sakhaw thlen san theih ber ni mah se nun piah lamah nghahhlelh tur thil duhawm tak a awm thung. Mi tin tan thil tih theih a ni lo a, inpekna leh chhungkaw malsawmna chu a kawng pawimawh a ni ber.

            Pi pute sakhua kha pahmei leh hmeithaite chena hmabak nei \heuh ni mah se a zawng zawnga an kalpui ve theih loh thil tam tak a awm. Sakhaw serh leh sang ken tel- insenna tur zozai kha mi tin ban phak a ni lo tlat a ni. A awm theite zar zovin khuangchawi nikhuaah mipui nawlpuiin hlim leh nuam taka an chen theih buatsaih tur khan buh leh bal, ranvulh chena hmuingil leh nei deuhte tih theih a ni. A nei leh nei lo inkar chuan kawng ro a su viau a, an dam lai zahawmna leh chawimawina an dawn mai piah lamah thih hnu thlamuanna petu chu an dam lai ngeia an thil tihah a innghat a. Thangchhuahpa chu mitthi khaw panna a kalna kawngah pawh zah leh chawimawi a dawng a, mitthi khaw piah pialralah faisa ringin a thlarau khawvel nun chu a hmang thei tawh a ni.

            Kristian sakhuaah chuan mi tin kan leng tawh a, kan khawsak phungin kan sakhaw kawngkalah nghawng a nei meuh tawh lo. Pi pute pialral chu kan tan vanram a lo ni tawh a, thangchhuah ngai lovin pianthar a lo ngai ta zawk. Buh leh bal sen ngai lovin rinna chu a thuken langsar ber a lo ni tawh a, a hausa ber leh rethei ber pawhin kan dam chhung ngeiin thlamuanna kan lo nei thei ta a ni. Hei hian khawtlang nunah inthliarna a tibo a, mahni insitna leh thlarau khawvel hlauhna min lak bo sak ta a ni. Chanchin \ha zara kan dawn rinna hian ringtute chu kan dam lai leh thihhnuah pawh min phuar khawm ta zel a ni.

            Pialral thurin leh kristiante vanram hi inhlat lo viau mah se a kalkawngah erawh inthlirna lian tak a awm a. Pialral kawng chu mi nazawng tan thil harsa a nih avangin \henkhat tan chuan vana rah ang a ni, vanram erawh mi tin banphak a nihna hi khawtlang nunah malsawmna lian tak a ni.

2. Khawtlang Inrelbawlna:

            Chanchin \ha zara kan dawn langsar tak chu khawtlang inrelbawlna hi a ni. Kan pi pute khan an chhehvela khua te, hnamdang kan tihte pawh an run fo a, an ram hauhna a nih rualin an châk lakna a ni ve bawk. Lal leh upate rorelna kha thu tawp a ni a, lal sual hrawn phei chu thil thleng zen zen lo ni mah se dam tinuam lo khawp a ni. Lal chu inthlahchhawnna zuiin a kal a, mi chhiate tan dinchhuah emaw hmasawnna kawng zawh a hautak hle. Bawi an nei a, bawite tan chuan damchhunga lal thuhnuaia kun tlawk tlawk a ni bawk. Tin, khawtlang zawlbuk leh tlangval kaihruaitu val upate chu zah leh chawimawi an ni a, an thu leh hla chu khawtlang himna leh innghahna a ni ber.

            Chanchin \ha avanga hmasawnna lo thleng zel chuan thil \ha zawk leh ngaihtuahna zau zawk min neih tir a, mipui thuneihna chu rorelna chelhtu a lo ni ta ni. Lal leh mi chhiate inkar a bova, bawi an bova, khawtlang leh ram rorelnaah mipui zawng zawng chanvo pek kan lo ni ta a ni. Hei hian ram leh hnam veina te, hmangaihna rilru min neih tirtu pawimawh tak a ni.

            Khawtlang leh ram rorelna hi kohhran inrawlhna tura ngaih lohna lian tak awm \hin mah se kan chenchilh miau si avangin a nghawng lo thei si lo a. Chanchin \ha leh ram rorelna mumal kan neih kha hnampui zawk kan tihte a\angin a nih miau avangin kan ngai kawp lo thei lo ve bawk. Lal rorelna hnuaia \ha lo leh dik loa an ngaihte min thlaksak rualin nunphung \ha tak tak kan la chhawm nung zel thei a, Mizo nihna bo chuang si lovin mi tinten chanvo pawimawh kan lo nei ta hi thil ropui tak a ni. Hnam movement kan tih ve fote hi a nihna takah chuan chanchin \ha zar a ni, hnam pum huapa \anrualna chang kan hriat hi skhaw thar lo pian hnu daih a ni.

3. |halaite khawvel:

|halaite khaw hawi hi ram leh hnam nunphung lanna pawimawh tak a ni. Hmanlai Mizo nunah \halaite hi khawtlang tana mi pawimawh tak an ni a, chu chu tunlai hun thlengin a la ni reng. Chanchin \ha zarah zawlbuk a\angin zirna inah kan lut a, kan khawhawi a lo zau a, khawvel tuverhah kan lo dak ve ta. Hei hi kan ramin tun dinhmun kan thlen theihna pawimawh tak a ni.

            Nitin tuk chhuaka hnathawk \hin hmanlai pi pute nunah khan nula tlangval tan chuan kut leh khuangchawi nikhua kha an vanglai nun hlim taka an chen theih hun a ni ber mai a. Nun hlim leh zalen taka inkawm hunte kha an nei lo viau a, lehlam lehlamah venthawn tur a tam em em bawk. Skhaw thar a lo luh rualin \halaite chanpual leh tih tur min chhawp chhuah sak a, kan \angkai leh hman theihna tur kawng kohhranin min ngaihtuah sak nghal zung zung hi Mizoram tan hian a hlu hle. |KP leh YMA a lo ding ringawt pawh hi Mizo \halaite tan mai bakah kan khawtlang nun thlenga malsawmna thlentu pawimawh tak a ni.

            Nupui pasal inzawn dan chungchangah te, kan inneih danah pawh chanchin \ha hian min thlak nasa hle. Inneih leh in\hen chunghcngpawh tunah chuan dan leh kristianna hian thui tak min hung tawh a, hei pawh hi hmasawnna kawng pawimawh a ni bawk.

5. Hmeichhiate dinhmun:

Hmeichhia leh pal chhia tih thu leh hla lo nei ve ngat hnam kan nih avang hian kan pi pute khawtlang nunah hmeichhia hi an chan a nep viau \hin. Zing a\angin hna an thawk a, buh an deng a, ei an rel pah a, tuichawi leh ran enkawl thlengin an thawk a, nileng hna hram thawka an hah viau pawhin chawhmeh eng ilo nen em khat lawihin in lam an pan leh a. Zanah nise nula tan phei chuan mut mu tuah mai theih a ni lo leh zel, an mahni rimtu tlangvalte lo chhawn leh kawm a ngai bawk. Pasal zawn kawngah lah chuan thuneihna an nei tlem viau lawi si! Prof. Darchhawna chuan hmanlai Mizo hmeichhiate khan awllen an nei ve lova, an hun pum kha buai leh hah takin an hmang niin a sawi a, “Tribal culture-ah chuan a tlangpuiin hmeichhiate hi an hah hle a, an thu hian ngaihsan a hlawh lo hle. Tunlai hunah erawh chuan engkim hi a dang ta.” [2] a ti bawk.

            Chanchin \ha zarah chuan hmeichhiate tan kawl a eng ta a, raicheh pawh thinhrik lova kan awm ta ringawt pawh hi kan vanneih hle. Khawhawi leh ngaihdan zau zawk min petu chanchin \ha chuan Mizo khawtlang nuna hmeichhiate dinhmun chu nasa takin a chawikang a, humhalh leh dawmkan an ni mek hi thil hlu tak a ni. Hmeichhe tih tur bika pi pute lo dah zawng zawng kha tunlai khawvelah chuan a ni ta hauh lo mai a, hmeichhe finin tuikhur ral pawh pel lova kan ngaih laiin tunah chuan Mizoramah ngei pawh dinhmun sang tak tak chelh kan lo nei ta nual mai. Kum 1913 kum bul lama Mizorama lo chhuak  Herbert Anderson chuan, “Khua han luh phat a\anga thil lang chiangsa em em chu Lusei hmeichhiate hi phurrit phurtu an nihn hi a ni” [3] tihialin Mizo hmeichhe dinhmun a hmuhte a ziak a, heng zawng zawng hi chanchin \ha zarah a danglam ta.

6. Zirna:

Chanchin \ha zara kan dawn hlu tak chu hawrawp kan nei a, zirna bul min \an sak hi a ni. Zirna kawnga kan hmasawnna hian tun dinhmun Zofate min hruai thlengtu pawimawh tak chu a ni. Kum 1890 vel a\angin British awpna hnuaiah kan awm \an a, kan chheh vela hnam lian leh langsar Bengali-ho kha Mizorama pawh lo langsar hmasa an ni. An nun leh khawsak phungin min chim \an a, an hawrawp hmangin zirna bulk an \an hman \helh a nih kha. Chu dinhmun hlauhawm a\anga kan chhuahna chu chanchin \ha zar a ni, Zofate tan a lova hlu em!

            Mizoram chhunga zirna bul\anna chu sakhaw huang a\anga in\an a ni a, sorkar pawhin Mission kutah zirna hun rei tak a dahna chhan pawh a bul\antu an nih mai piah lamah lang thama hmasawnna an thlen vang kha a ni ngei ang. Zirna school an din a, Pathianiah Sunday school an siam bawk a, ziak leh chhiar kha kan hnam hmasawnna tur a ni tih an hmu chiang em em a ni. Tun dinhmunah pawh hian chik zawka thlir chuan Zoram chhunga zirna in zingah kohhran enkawlte hi hmahruaitu an la ni zel a ni.

            Zirna min \an sak hian hnam dang hriatah Mizo dinhmun min phochhuah sak a, hmasawnna kawng min zawh tir a, kan khawtlang nunphung min khalh sang zel a ni. Mi thiamte hi khawtlang leh ram hmel lanna an ni a, chutah chuan kristianna hi bul\antu leh hnarkaitu pawimawh ber a ni.

7. Hriselna kawng:

            Sap upa leh Pu Buanga-te Mizorama an lo luh tira an thil chhinchiah langsar tak chu Mizote balh zia leh kan khawsak phung mawl zia kha a ni. Hriselna hi ram leh hnam hmasawnna tehfung pawimawh a ni a, mihring dam rei leh rei lote hi tunlai huna ram changkang tehna pawimawh tak a ni. Tuk chhuaka hna thawk, zuk leh hmuan nena khawsa, taksa leh chenna hmun pawh tihfai nachang hre lo, zun leh ek thlahdah tak hnam kha tunah chuan kan lo danglam ta, chanchin \ha zar kan zo liau liau a ni.

            Inthawina hmanga damna beiseiin an neih leh hun an seng a, an khawsak dan a thianghlim loh avangin natna neuh neuh a tam a. Thihpui tham natna pawh an ngah rualin an nun leh hmel thlengin an thawhrimna chu a lang a, dam rei theih a ni lo. Zosapte zara nu thihsan naute enkawl nachang kan hre ringawt te, kan chawlhkar chhiara chawlhni kan nei ringawt pawh hi thil hlu a va ni em! Thawk ngawt ngawt lo deuha chawlh hahdamna kan nei te, zuk leh hmuan \hat lohna kan hre ta zelte hi kan hnam damna a ni. Zosapte’n hriselna atana an hnathawh hi tun thlenga mi tam tak damna a ni a, ei leh in dan, zun leh ek, kan incheina leh thianghlimna te chena min kaihruaitu chu kristianna lo kengtu kan Zosapte kha an ni.

Tlangkawmna:

            Chanchin \hain kan hnam min sawi danglam nasatzia hi sawi tur a va tam em. Kan hnam nun hrim hrimah kha thil \ha tam tak a awm a, chu chu kristianna nen a lo inrem em em mai bawk a. Entirnan tlawmngaihna kan tihte hi Isua zirtirna nen a inrem em em a, zai leh lam ngaina hnam kan lo nit e, \anpui ngeite \anpui thlengin an kal dun zel a ni. Hei hi Mizo khawtlang nuna kristianna a tlak nat em emna pawh a ni thei hial awm e. Engpawh nise, chanchin \ha hi Mizote dam khaw chhuahna, hlawhtlinna leh enkawl zeltu pawimawh tak a ni a, a la nih reng a rin awm. Rev. Lalhmingchhuanga Zongte thu hmang hian i tawp teh ang, “Mizote chu leilung hausakna avanga ding chhuak kan ni lo va, Industry leh technology avanga hmasawn pawh kan ni em em lo. Chanchin \ha dinchhuahpuite kan ni a, chanchin \ha zara khawvel eng rawn hmu ve kan ni… Chanchin \ha zel hi kan hnam damna leh kan hmasawnna tur a ni, Chu chanchin \ha chu kan nunpui loh tik apiangah tlakhniamna leh chhiatna khurah kan lut zel dawn a ni.”[4]

************

---

[1] Lalthangfala Sailo. Lung Min Lentu. p.234(Mizo Culture leh Kristianna hi a inrem a ni)

[2] Pi Pu Zun Zam, (GHBC-2008) [Mizo Culture leh kristianna- Prof. Darchhawna]

[3] Among the Lushais – Herbert Anderson, p-27 [Trans-Rev Raltawnga]-2016

[4] Lalhmingchhuanga Zongte, Savun Kawfual .p.18- 2017