Chai leh Lam: Mizote Nun

 Chai leh Lam, Zai leh Chheih Lo Chhuah Dan, A Kalhmang leh Mizo Hla Ziarang Pawimawh A Nih Dan

1. Thuhmahruai

Hla hi thuhlaril hlawm zinga pawimawh ber pakhat a ni a, mihring thinlung chhunga kan thil vei leh suangtuahna emaw kan ngaihtuahna leh tawn a\anga kan phuah chhuah a ni a. William Wordsworth-a chuan, “Hla chu mihring thinlunga vei, lo luangliam hi a ni” tiin a sawi. Hla mawi leh \ha chuan mihring nun a chhawk a, hlimna a thlen a, lungawina leh inhnemna \ha tak a ni. Chu hla famkimna chu mihringah a lo thawk a, taksa che chhuaka lampui hup hup a lo ni \hin. Hlaah hian a hlarua kan tih, thu kan hman hi thil pawimawh tak pakhat a ni. VL Zaithanmawia chuan hla chu heti hian a hrilh fiah a,

Hla hi thu par a ni a, a kungpui chu ‘thu’ a ni. Thlado lerah Chawnpui a par ang hian thu lerah hla a par a ni. Mahse, thu awmkhawm satliah mai hi hla a tling lo; thu mawi chitin rem taka chuktuah khawm hi hla a ni. Pangpar hi a mawi hle a, mahse, a kung hi a par a ni thei lo angin, hla pawh hi thu aiin mawi mah sela, thu nen chuan thlei hran theih mahse, thu tel lovin kan siam thei lova. Thu tel lova kan siam theih loh avang chuan ‘thu’ a ni mai hek lo. Tual lenna \awngkama kan hman ngai hauh loh hi hla chuan thu mawi a ngah a, hla thu mawi ber berte chu tuallen \awngkamah kan hmang ngai lo. Tichuan, thu chu pangpar kung nen tehkhin a ni a, hla chu a pangpar par nen tehkhin a ni. Hei vang hian a ni hla hi ‘thu par’ kan tih ni. (Laldinmawia 49)

He hrilhfiahna a\ang hian hla awmzia leh hla atana thu hman pawimawhziate, chu chu hla hlutna leh mawina a nihzia pawh chiang takin kan hmu thei awm e. Chumi hrul chiah chuan hla thluk pawh thil pawimawh tak a ni tel bawk. Hla famkimna chu sak chhuah/chham chhuah a nih hian a lo awm \hin bawk. Mizote hi hla thu hran bik neia kal kan nih avangin hla thu mawi leh luang \ha chuan mi rilru a hneh a, a thuken chuan mihringte hi che lo thei lo ang hialin min siam a, kan lampui lawp lawp \hin a nih hi. 

Chheih lam

2. Mizote leh zai/hla

Mizo nun leh hla hi inkawp tlat ti ila kan sawi sual awm love. Mizo hla lo chhuah dan hi sawi dan hrang hrang a awm \hin a. |henkhat chuan “Mizo hla neih \an dan. A bul thu sawiah chuan kan hla neih \anna chu kan chanchin (history) kan chhui theih hlat ber hun vel a\anga hla hi lo piang ve ni ngei tur a ni.” (J. Malsawma 141) Hrang\hiauva chuan “Mizo hnam \obul tak hriat phak a ni lo ang bawkin an hla neih \anna hi hriat phak a ni lo. Mizo hnam lo chhuah \an tirh lai pawhin hla chu an nei tawh ngeiin a rinawm a ni” (Mizo Chanchin 300) a ti ve bawk. Hla kan neih hun hi chhui dan hrang hrang awm mah se mihring nun nena kalkawp tlat a nih avang hian Mizo hnam indin rual hian hla eng emaw hi chu lo piang ve nghal mai niin a rin theih awm a, Mizo hnam chhuahna bul kan chhui fiah lo ang deuh chiah hian Mizo hla neih \an hun hi hriatfiah theih a ni lo. Mizote hi zai ngaina tak kan nih avangin hla hi chu kan nei hma hlein a rinawm viau.

Mizo hla hlui chuangchang ziaktu Chhuanvawra chuan chhui dan hrang hrangte a\anga a hmuh dan tihian a sawi a, “Kan hriat theih china Mizo hla upa ber chu \huthmun zai a ni” (Mizo Hlate 13) tiin a sawi a. B. Lalthangliana chuan “Mizo hla hmasa ber chu kan hre pha hauh lova, amaherawh chu Mizo hla hlui zingah tuna kan hriat theig china hlui ber nia lang chu ‘Tlar hnih hla’ niin kan ring a” (Mizo Literature 8) tiin a sawi a, chung tlar hnih hla a sawite chu Nauawih hla, bawhhla leh hlado, dar hla, salu lam zai te niin a sawi bawk. “Mizo hla huite kha chik taka kan thlir chuan kawng kal fel tak nei a ni a, a tlar zatin a upat dan a hril thui hle. Mizo pi pute hla upa ber nia hriatte chu tlar hnih (couplet) a ni deuh zel”. (Thanmawia 5)

3. Chawn leh lam, zai leh chheih hlate

            Mizote hi zai ngaina hnam tia sawi kan ni fo a, chutih rual chuan kan hlate hian ken tel lian tak a neih chu lâm a ni. An hla sakna hmun leh hun a zirin kalphung an nei hrang ve thliah a, kan hla hlui tam zawk erawh lam hla a ni ber. Mizo hla chhuak hmasa kan tih zingah Salu lam zai te, Chai hla leh Chawngchen zai kan tihte hi lâm hla ni deuh bikin a lang. Hla hlui ziarang chhuak tlai deuh- Puma zai leh a siper \henkhat pawh lam nena inkungkaih hla a ni deuh vek bawk. RL Thanmawia chuan,

      Hnam hrang hrang rimawi (folk music)-ah hian lam paha sak chi hlate hi a tel deuh zel a, rimawi leh lam leh zai inkawp a nih avangin heng hlate hi hla hlui zinga a lar leh hlapuia neihte an ni zel bawk. Mizo pi pute hlaah pawh hian chute ang chiho chu Chai hla, Chawngchen zai, Salu lam zai, Tlanglam zai, Chheih zai leh hla dang tlem kan nei a. Heng hlate hi Mizo hla hlui kan sawia kan rilrua lo lang nghalte an ni fo. (166)

3.1 Chawngchen zai

Chawngchen zai hi “Run leh |iau inkara an awm laia chhuak” (135) niin RL Thanmawia chuan a sawi a, “1450-1700 inkar huna hmasa lama chhuakah dah ila a sual tam lo vang”. (Mizo Lit. 19) Chawngchen zai hi  chawn zai tih te, zailam hlapui an ti tein an sawi bawk a, a chhuahna hmun emaw khaw hming a pu zel bawk. Chawnchen hi Mizo sakhaw kawngkal nena inkungkaih, khawtlang huapa hlimna hunpui ber pakhat a ni a. Chawn kan tih tâk pawh hi Chawng emaw chawngchen kan tih a\anga lo kal niin a lang bawk. Pi pute sakhaw kawngkala inlama thangchhuah tura rahbi hmasa ber chu Chawngfâng a ni a, hemi huna an hla sakte chu chawngchen zai an tihte chu a ni. Khama Chhakchhuak chuan “Chawn lam tih chu ‘mi hausa leh neinungten an sakhaw kawng zawh a, Puithiam kaltlanga sakhaw tan inphal taka an neih ran leh sum senga an inhlanna hi a ni” (Khama 77) tiin a sawifiah a, chumi ni chu mipuite chuan zu leh sa nen lamin hun an hmang a, hei hi chawngchen chu niin a sawi bawk.

            Chhuanvawra chuan Chawngchen zai chhuak hmasa ber chu Tlangkhuaa an awm lai niin a sawi a. “Tlangkhuaa an awm lai chuan chawng an chen a, chawng chen e ti lovin hla sak tur an hre mang lo va. Chutia hrilhhai deuha an awm lai chuan Chuaungo mi Vanthuman hla thar a han phuah chhuak ta a, chu chu Chawn zai an lo ti ta a ni an ti.” (Mizo Hlate 17) tiin a sawi a, RL. Thanmawia chuan Lersia chu Mizo zinga chawngchen hmasa ber niin a sawi ve bawk.

Chawnchen zai hi “Sechhun leh khuangchawi \umah te, chawn leh lam hunah te an sa ber a, khawlaiah hla lenglawng angin an sa bawk” (Mizo Lit. 19) niin B. Lalthangliana chuan a sawi. “Chawngchen zai hi hla thuk hah dam leh khamphei tak a ni a. Zai leh lam inkawp kan neih zingah chawngchen zai hi chhiar tel a ni ve \hin a, mahse an lam chhuak meuh lo.” (Thanmawia 137) Thingfar zana chawngpa ina nula leh tlangval \hu kual ten an sa a, an insawi dual dual a, chawngpa erawh a lam ve \hin bawk. Hetah hian hla hruaitu leh rimawi- khuang leh seki tumtu chu a laiah an \hu a, nula leh tlangvalte chuan zaiin an \huthmun inthlak kualin an hlim hle \hin. Nula leh tlangval tan chuan hun nghahhlelhawm ber pakhat a nih avangin he hun hi tlaivarin an hmang a, an inbuatsaihna a nasat bakah mi tin an phur em em vek a ni. Chawnchen hi Mizo hla hlui zinga lam nena inkungkaih lian tak a ni a, mipui nawlpui huap lam hla pawimawh tak a ni. Chawngchen zai hi a chhuahna khaw hming chawi a ni deuh zel a, a lar zualte chu Tlangkhaw zai, Lumtui zai, Dawn zai, Tlangphei zai tih te bakah Hla tluang, Zailam hlapui, khawhar zai tihte pawh a awm bawk.

3.2 Chai hla

Mizo hla hluia lâm hla dang kan neih leh chu Chai hla a ni. Chai hla hi Mizo nunphunga lian tak, tunlai hun thlenga kan la hman a ni. Mizo hla hlui kalhmanga \awngkam langsar ber chu zai a ni a, mahse chai leh zai hi sawi zawm a rem lo nge, zai ti lovin hla tih a ni bik tlat.

…Chai chungchang kan hriat hmasak ber chu Suaipui leh Saihmuna an chai mup mup Pawiin an beih thut thu a ni a. Chu lai hmun chu pi puten Thântlang leh Run an rawn liam thlak hnua tlak lam pangpera an chen lai a ni a, kum 1600 vel a ni mai thei. Heng hun laia khawpumin hlim taka an chai mup mup tawh chuan a hma kum tam feah an ching \an tih a rin theih a, kum 1550 vel te hi chuan an chai tawh \hin mai thei e. (24)

            Mizo kut pawimawh ber pakhat Chapchar kut kha chai hunpui ber a ni. Chapchar kut a lo thlen chuan mi tin an hlim em em a, nula leh tlangval an hlim zual emaw tih theih a ni. An hun hman chu an hlim dan a zirin a duh rei thei viau a, kar khat lai te an hmang \hin. Hemi chhung hian chhungkuaah pawh inhauh emaw nupa intihtlan emaw innghirnghona lam chi reng reng an ti ngai lova, thiang lo tlukah an ngai. “Chutiang taka an ngaih pawimawh leh an ngaih ropui hun laia an nun tihlimtu leh tinuamtu pakhat chu chai a nih avangin chai hlate hi an tan khan a hlu em em a ni.” (Thanmawia 167) Chai hla chi hrang hrang a awm a, a lar zualte chu Thailungi zai, Lalvunga zai, Mangkhaia zai, Zopui zai, Lera zai leh zai dangte a ni.

3.3 Salu lam zai

Salu lam zai hi salu lâmna hmuna an sak \hin hlate sawina a ni ber a. Hlado leh Bawhhlate hi an nei hma viauin a lang a, chumi ken tel pawimawh tak chu salu lam zai kan tih hi a ni awm e. Salu lam zaia “an hla thu awmzia, \awngkam inchheh khawm dan leh hmun hming an sawi tel a\angte hian, Thantlang leh Run kam vela an khawsak laia chhuak niin a lang.” (18) Kan pi pute kha mi huaisen ngaisang an ni a, an dinhmunin a zir lo bawk a pasal\hate kha chawimawi leh ngaihsan rawn an ni. An sakah pawhin ropui taka lawmpui leh chawimawi an ni \hin a, hunk al zela an khawsak lo awlsam deuh hnu pawhin pasal\hate an mamawhna erawh a reh chuang lo. Chutianga pasal\hate salu hawn an aihna leh lawmpuina hlate chu salu lam zai kan tihte chu an ni ber. Sa kaptu inah emaw sa lu aitu inah emaw, mualah emaw zu leh sa nen an hla an sa a, an lam mup mup \hin. An hlaahte chuan an dinhmun puanchhuahna leh an inchawimawina a langsar viau bawk. Salu lam zai lar zualte chu salu lam hlapui, Sa lam hla phei, Sakhal zai, Lianlunga Sakhal zai leh Sa lam hla \hu te an ni.

3.4 Puma zai

            L. Keivom chuan “Puma’ tih hi Biate \awng a ni a ‘Pathian’ tih na a ni” (Lalthangliana 172) Kum 1830-1850 vela Biateho thlang tlain Vairengtea an awm laiin an phuah \an niin a sawi bawk. K. Zawla chuan hetiang hian a sawi a, “Kum 1871-a Lalburha’n sipai silai 13 a laksak lachhuak tura Manding sap Edgera lo kal khan, kuli tam tak a rawn hruai a. Biate an tel a ni ang chu, Biate hla Puma zai hi Mizovin an lo hria a, an sa ve ta a ni. Mahse rei lo teah a reh leh ta mai a. Kum 1880 thingtam laia Tuirial dunga vai hnena eitur zawngten Kuliho sak an hre thar leh a, an ching thar leh a, an phuah belh nual a….” (Zawla 385) tiin a sawi ve bawk. Heng hi Zoram pum huapin a lar chhuak lo niin a lang a. Zoram deng chhuaka larchhuak erawh kum 1908 hnulam kha niin a lang, Puma zai lo lar thar leh dan hetiang hian K. Zawla chuan a sawi,

Kum 1908-ah khan Zawngin lalpa Lalzika chuan a thian ama pawimawh tihsak turin Lalhleia khua Ratu-ah a tir a. Chu tlangval chuan Khawzadala khua Bunghmun a tlawh hmasa a, chu khua chuan, hmar lam pa pakhat nau awi sak an hriat chu Zawlbukah an lo sa ve a. Zawngin tlangval khan a thluk a chhinchhiah a, an khaw lama an lalpa ho chuan an sa ve ta a. Tha an tihzawng tak a lo ni a, lal \hian pakhat Thangkunga phei chuan a phuah thiam a, an sa duh hle a; an hla siam thar apiang chu Zawngin khaw chhunga an sak lar ber a lo ni ta a. (385)

hei hi Puma zai lo larchhuahna pawimawh tak niin a lang a. B. Lalthangliana chuan Puma zai hi kum 1907-a chhuak niin a ziak a, Zawngin khaw lal Lalzika tirh hi tlangval pawh pahnih niin a sawi a, chu chu Liangkhaia leh a \hian niin a sawi thung. Lalhmuaka chuan kum 1908 March niin a sawi a, Zatluanga chuan “Kum 1905 a\ang tawh khan \an a ni a, mautam 1911 lai vel khan a ram pumin uar vanglai tak chu a ni a” (Mizo Chanchin 58) tiin Tlanglam zai nen a sawi kawp ve bawk. Tichuan, Puma zai in\an hun hi kum 1907 hnulam ngei chu niin a lang a, Zoram pum a tuam hneh hle tih erawh chu mi tam tak tarlan a ni.

Puma zai hi Tlanglam zai tia sawi an awm a, Lalhmuaka chuan “He hla sa hian tlangval zawng zawng mai, kawtlaiah an lam ta dual dual mai zuk nia le! Kawtlai pawng \ha deuh leh remchang deuh hi an lamna hmun a ni \hin a; chuvang chuan rei vak lovah phei chuan ‘Tlang lam zai’ tihin an thlak ta thuai reng a ni.” (Lalhmuaka 139) Rev Saiaithanga pawhin “In chhunga lam duh tawk lovin, mualahte an lam za ta hut hut \hin a; a hmingah pawh Tlanglam zai an ti ta zawk a.” (Saiaithanga 30) tiin a sawi ve bawk. Thenkhat chuan a Puma zai hla tlar hnih a\anga tlar thuma an phuah belh hnua puma tih thumal a tel tak loh hnua Tlanglam zai nita niin an sawi ve bawk a. |henkhat erawhin Tlanglam zai chu hla thluk thar, Puma zai chhuah hnu lawka chhuak niin an sawi ve bawk.

3.5 Chheih zai

            Chheih zai hi Puma zai chhuah hnua chhuak niin sawi a ni ber a, Puma zai siper zinga mi niin a lang. Puma zai vanglai takin kum 1911 khan Mizoramah mau tam \am a lo thleng a, a hnu kum 1913 khan harhna a lo thleng ve leh bawk. Heng avang hian Puma zai leh tlanglam zai lo kal zel tur a chu a chep ta zel a, amaherawhchu zu hmun leh sakhaw hlui thila la lungleng zualte chuan hla thar an chhing chhuak leh a, hei hi chheih zai lo chhuahna chu a ni. An hla sak pah chuan an lam a, an lam pah chuan chheih an tia, chhei zai an ti ta niin an sawi.

            Chheih zai hi tun hun thlenga Mizo zai kalphunga neih a ni ti ila kan sawi sual awm love. RL Thanmawia chuan Chheih zai hi “An chheihpui theihho hla hrang hrang an sawina a ni a, chung hlate chu – Zawlbuk zai, Khaw\iau hla, |uan hlate hi a ni a, lampui \hin hla bawk a ni. Chhei zai leh lam hi a chhuah hun a tlai hle nâ a, Mizo hnam zai leh lam kan neihte zinga hnamdang hmuha entir hlawh pawl tak a ni” (Mizo Hla 498) tiin a sawi bawk.

            Heng hi Mizo zai hlawm kan neih zinga lampui deuh ber hlate a ni hlawm a. Heng hnuaiah hian hla chi hrang hrang a awm tel bawk a, chung hlate chu a thuk hran dan mila hlabu hming hran pek a ni hawm zel. Chheih zai hi Mizo zai leh lam kalhmang zinga a hnung ber pawla sawi a ni a, sakhaw thar lo luh hnua lo chhuak chauh nia a lan avangin a kalhmang pawh a dang deuh. A tlangpui thuin Mizo zai kan tih, mipui nawlpuiin an lampui hlate hi a inzul hlawm em em tih a hriat theih a, Mizo hla hlui hlawm zawng zawng hi a huap thei vek tho awm e.

4. Mizo lâm leh hla kalhmang

            Mizo zai kan tihte zingah hian kan sawi tawh angin lan nena inkungkaih a awm nual a, a huhova lam chi hi a tam zawk nimahse Chheih zai kan tih bik erawh mimala lam chi a ni thung. Salu lam zai kan tih te, Chai hla kan tih te leh kum zabi sawmhnihna bawra lo lar chhuak Puma zai leh Tlanglam zai te hi a tlangpuiin mipuiin a huhova an lampui a ni ber.

            Kan pu pute huna mipui nawlpui huap lam lian tak chu chai lam kan tih hi a ni awm e. Chai hi chapchar kutah an hmang ber a, hei hi khawtlang nghahhlel leh an hlimpui ber kut pakhat a ni. Chai lam dan chu mipa leh hmeichhia inkarthlakin an dingkual a, mipain hmeichhe koki a vuan a, hmeichiain mipa kâwngah a vuan kuah ve bawk a, a laiah khuangpu leh rimawi dang tumtute an ding a, tichuan hla an lak rualin lamho chu an insawi kual dup dup \hin. An hla sakte hi a tlangpuiin hla lam nawn (repetition) kan tih ang kha a ni deuh tlangpui a, chuta hla tlar hnihna an sak nawn hunah chuan hla hruaitu khan “Lam i thai ang  le” a han ti a, tichuan dinlamah inthenin an an ke chu ding leh veiah an chhep rual lehin an su rual dual dual \hin a ni.

            Zai dang- Salu lam zai kan tih te, Puma zai te pawh hi a huhava lampui chi a ni deuh vek hlawm a. Puma zai leh Tlanglam zai hi sawikawp a nih theihna chin a awm a, lâm chungchangah erawh chuan Tlanglam tiin a sawi theih awm e. Tlanglam an neih dawn han mipa leh hmeichhia chu an ban thlakthlain ngil takin an ding tlar a. Khuangpu emaw hla hruaituin hla a lak hnuah an ban chu an theh a, rual leh awmze nei takin an theh a. An ke pawh awmze nei takin an theh rual dual dual \hin. Hei hian chiang taka a lan tir chu kan pi pute kha a huhova thil ti \hin leh, hlim leh lawm nikhuaa inkawmho dial dial a nihna a tichiang viau a, chu chu an hlimpui ber niin a lang bawk.

            Kum 1913 hnulama chhuak chheih lam kan tih erawh tlemin a lo danglam ta deuh. Kum 1984 a\angin Mizoramah sakhaw thar kan hmelhriat \an a, chu chuan kan nunphung leh hawiher min thlak sak ta tial tial a. Mizo nunhluia thil tih tam tak chu Kristian sakhua nen chuan kal dun thei lovin, bansan a ni ta zel. Chung zinga langsar tak chu kan lam leh zai kalhmang hi a ni. Kan pi pute hla hlui mai piah lamah a thluk leh zai dan chen maiin ramhuai thil tia hnawl a ni ta zel a. Sakhaw tharah chhawm zel a rem tak loh avangin kan zai leh lam chuan chuai lam a pan ta zel a ni. Hemi hnua lo lar thar leh Puma zai hi pi pute nunhluia zai leh lam indintharna pawimawh tak pakhat chu a ni a. Chumi hnu lam zela hla hlui thuka lo piang hlate pawh Puma zai siper tia sawi zel a lo ni ta a ni.

            Chheih lam pawh hi Puma zai vanglai pelh tawh hnua nunhlui lama la lunglen mi \henkhatten zu hmun leh khawi hmun emawa an hla sak paha an lam chhuahna hla a ni ber a. A hnu zela Kristian sakuaa rinna dang lo neita pawl \henkhatte phei chuan sakhaw biakna hmun pawimawh takah an hmang ta hial a ni. Hla hlui hmasa dangte ang lo takin mimal lam emaw mi pahnih khat lama sak chi a ni deuh ber tawh a, Chheih lam kalhmang langsarah chuan,

Hmeichhia leh mipaho chu chhuatlaiah an \hu kual a, chutah lám hmahruai mipa chu a lo ding chhuak a, hla thu ruah\ham loh a lo chham chhuak a. Chu veleh khuang bengtu chuan chu hla thar diai chu a han la \an a, chutah mipuite chuan kut beng leh zaiin an lo zawm thuai \hin a ni. Lam hmahruai chu khaw khat lam thiam a ni bawk a, zei takin a kut leh a ke, a taksa bung hrang hrang chu a han chettir a, lam hmahrua lam thiam \henkhat chuan dawithiam a rang maiin a dirin an dir ngar ngar a….chhuat dek thuak thuak khawpia intihniamin an thiamzia an lan tir bawk. (Chuailo 66)

            A tlangpuiin Chheih lamah hian hmeichhia leh mipa chu an inkawp deuh ber a, inkawm kima lam a ni deuh ber bawk. Mipa leh hmeichhe lam chhuakte chu lamtualah chuan inchhai kual ta \hin a, hei hi chheih lam kalhmang langsar tak a ni bawk.

5. Chai leh lam lo chhuah chhan

            Mizo hla hlui ziarang langsar tak chu hrilh chawpa sak a ni. “Hla thluk awmsa, an sak bel tawh eng emaw ber hmangin hla thu thiam deuhin an hril a, an sa chawpchilh nghal mai \hin.” (Mizo Hla Hlui 8) Mizo hla hlui hi mimala sak chi a awm vak lova, a hu hova sak dual dual chi a ni deuh vek avangin chutah chuan chet dan hmangin an hla sak an hlimpuina chu an tichhuak ta \hin a. Lâm kalphung kan neihte pawh hi hla sak ngawt aia mihring a\anga phurna leh châkna lo chhuak a\anga lo indin a ni. Hei hi Mizote kalphung lian tak a ni a, Kristian sakhua kan zawm hnuah pawh hei hi kan la lut zel niin a lang.

            Chai leh lam lo chhuah chhan hi langsar tak tak a awm theih rualin pi pute hla hlui kalhmang leh kalpui dan a\angin a tlangpui lo tarlang ila.

5.1 A huhova thil ti \hin an nih avangin:

Mizo zia langsar tak chu hohova khawsa \hin kan nihna hi a ni. “Dam leh tlangkhatah, thih leh ruam khatah” tiin \hiante inphatsan phei chu hrehawm leh nuamah pawh nise kan duh ngai lo. An neih ang ang an hei hova, zu leh sa pawh nise mimala ei in bik nih an duh ngai lo. Chu an khawtlang nun kalphung chu an hlim lawman hlaah pawh a lo lang a, kan hla hlui tam zawkte chu a huhova sak chi deuh vek a lo ni ta nghe nghe a. Chutah chuan a huho vekin an lam ta dual dual a, chu chuan mi dang a kangkai a, an hlimpui ta em em \hin a ni. Kut ni vangthla an hmanin mi tin an theihtawpin an inbuatsaih a, khawtlang huapin hun an hmang a. Sa lu an lawm chang lahin \henrual \ha nen hlim takin zai leh lam bawkin an chen leh bawk.

Chawnchen zai hla an sak dawnin hla hriltu chuan ‘E za e, e za e; Aw za e, aw za e’ tiin a chham hmasa \hin. Hei hi hla ki lakna angin a sawi theih a, a awmzia berah chuan, “E kan tih leh e ti tlang ila, Aw kan tih leh aw tiza ila” tihna  an ni. “Kan lungngaih leh inhnem tawn ila, kan lawm leh inlawmpui ila, nuam kan chen leh chen zai la, kan thih pawhin ruam khatah thi tlang ila an ti \hin” (Zairema 273) tiin sawifiah theih bawk ang. 

5.2 Zai ngaina hnam kan nih avangin

Mizote hi zai ngaina hnam kan ni tih hi phat rual a ni lova, chuvangin hmanlai a\angin hla phuah \hiam leh zaithiamte chu ngaihsan an hlawh em em a ni. Khaw khata zaithiam emaw hla phuah thiam neite chu khaw hming \hatna a ni a, an khaw lalte lakah pawh heng hla phuah thiamte hi ngaihhlut an hlawh hle a ni. Zai chuan lam a ken tel miau avangin hunpui an hman reng rengin chung hla phuah thiamte chu an innghahna a nih rualin an hla hrula lam dual dual chu mipui chan a ni ve thung. An hunpui leh thil thlengte kha zai leh lam nen a inkungkaih tlat a ni tih a lang chiang hle. An lawmin an zai a, an lungngaihin zai bawkin an inhnem a, zai chu an nun khalhtu pawimawh tak a ni. Sakhaw biak kawngah pawh zai tho kha an innghana pawimawh a ni bawk a, chu chu mipuite emaw mimal ang pawhin an inpuan chhuahna pawimawh a ni tel bawk.

            Kum zabi sawm hnihna chho vela lar Awithangpa te, Hausiampa te, Lelthangkiuva te, Hrangchhawni te hmingthanna chu an hla leh lam thiamna a ni a. Chu chuan an khua leh a chhehvelah a hming a tithang a, an ngaihlu em em a ni. Hei hian zai leh lam chu Mizo nunphung nena inhnaih a nihzia a tichiang viau a ni.

5.3 An nun hahdamna lian tak a ni

            Tukchhuaka hna thawk \hin an nih avangin kan pi pute nun tam zawk kha hah leh chau takin an hmang a, an nun hahchawlhna lian ber chu zai leh lam a nih miau avangin heng hun hi âm takin an hmang \hin. An nuna lawmna lo thlengte kha hlim leh nuam taka lawm an duh a, zai leh lam hmanga zu leh sa nena lam chu an tana thil hlimawm sang ber niin a lang. Chai hla kan neih hrang hrangte leh Chawngchen zai te kha mipui vantlangin nun hahdamna bera an hman a ni a, an taksa chau leh hnathawh hah zawng zawng theihnghilin khang hunah khan an nun kha an chen tawh \hin. Chapchar kut thleng tura an inbuatsaihna nasat zia te, sa lu lam zai leh Chai hun thlenga an insen hreh lohziate hian pi pute nunah an taksa leh rilru chhawktu an ngaihhlut zia a tichiang viau bawk.

5.4 Nun inbunruahna \ha ber a ni

            Mihring nunah inbungruahna \ha ber chu thu leh hla a ni. Chu chu kan pi pute nunah pawh khan a lian hle a, an lungngaih leh lawmna kha zai leh lam hmangin an inbunruak \hin. Mizo zai hmingthang tak Zopui zai lo chhuak kha Tlanrawnho an suat avanga an hlimna inunruah nan chai hla \ha tak tak lo chhuahna a ni a. Puma zai leh Tlanglam zai kan tihte pawh an nun chep leh ipik a\anga inbunruahna anih avanga lar ta hluai niin a lang bawk. Chuvangin an nun an lawmna leh an ipiknate chu lam leh hla hmangin an inpuang chhuak a, an nunah thawvenna a lo awm \hin. Chheih zai pawh zurui lunglen ten nun hluia an lunglenna a\anga chheih dar dar paha an lo chin zel a\ang lo chhuak a ni a, Mizote hlimpui leh lam zia pawimawh tak a lo ni ta zel a ni. Hun lo kal zelin a tidanglam ve zel bawk, RL Thanmawia chuan chheih lam hi chetziaa mihring nun tarlanna, lam duhawm tak niin a sawi bawk. (Chuailo 68)

5.5 Sakhua nena inkungkaih a nih avangin

            Mizote hi sakhaw la urhsun tak hnam kan niin a lang. Pi pute hla hlui tam tak kha sakhaw kawngkala thil pawimawh tak tak a awm hlawm. Chai leh lam kan tihte pawh hi sakhua nen inkungkaihna chin a awm. Chawngchen hi Thangchhuah kawngpui pawimawh a ni a, chu chu mi tin huap hunpui a ni. Sa lu aih pawh chutiang zelin thihhnu piah lam kawng a hril zel. Chutiang a nih avang chuan zai leh lam hi pi pute tan chuan inkungkai deuh vek a nih avangin a chhuak deuh zung zung mai niin a lang.

            Heng chhan hrang hrang avang hian chawn leh lam, zai leh chheih te hi Mizote nunah hian awmzia a nei lian em em a. Kan nunphunga bet lian ber a lo nihna chhan pawh kan zia leh kalphung nen a inhmeh em vang a ni tel bawk.

6. Chheih zai kalhmang leh vantlang hla a nihna

            Chheih zai bik hi kan sawi tawh angin kum 1910 hnu lama chhuak a ni a. Kristian sakhua a lo luh hnua pi pu zai ziarang lo lar thar Puma zai siper zinga pakhat a ni. Chhuanvawra chuan “Chheih zai hi ‘Puma’ tih tel lo Tlanglam zai vul hmasa ber niin a lang, kum 1910 vela vul \an a nih a rinawm.” (Mizo Hlate 134) tiin a sawi. Chheih zai lo pian dan leh a chanchin tam zawk chu a hma lamah kan tarlang tawh a, a kalhmang tlangpui lo thlir ila.

6.1 Chheih zai hi mimal emaw pahnih khat leka lampui chi hla a ni. Hei hi a hmasa lama kan sawi tawh angin kan hla hlui dangte hi a huhova lampui chi a ni deuh ber a. Chheih zai erawh chu mimal emaw pahnih khat inkawpa lam mai theih a ni thung.

6.2 Chheih zai leh lam hi kal kawp tlat a ni bawk. A tir lamah zu hmuna hlimhlawp pui mai maiah ngaih a nih laiin hun lo kal zelah hla dang lo chhuak zel nen, chhei lam hian hla a pun belh tir rualin chheih lam hmangin hla hlui tam tak an lampui \hin bawk.

6.3 Chheih zai hi uar leh phur taka lanchhuah tir a ngai a, mimal zalenna leh hlimna vawrtawp lanna pawimawh tak a ni bawk. Chheih lamah hian a lamtute chu an theihtawp chhuahin mawi takin an lam a, an uar poh leh a mawi \hin. Han thlawh deuh delh delh te, kun hniam hun leh kechheh thengin awmzia a neih avangin miin a duhtawka a lam meuh chuan mawi tak a ni \hin.

6.4 Chheih zai kan tihahte hian an zai paha ‘chheih’ tih an sawi \hin avanga hming pu niin a lang. A zai hmasa lamah phei chuan hla chang tinah chheih tih thumal hi \henkhat chuan an ziak tel nghe nghe. Hei hi ziah tel a nih loh pawh a lam te emaw hla hruaitu emawin an uarna lantir nan chheih tih hi an hmang fo bawk.

6.5 Chheih zai kalhmang hian kan hla hlui tam zawk, chai hla leh chawnchen zai chen maiin lam rem vek theih a ni a. Tunlai hunah phei chuan kan hla hlui lam kalhmang emaw tih mai turin kan uar ta tih theih a ni bawk.

6.6 Chheih zai hi nula leh tlangval inlemna hla, lengzam hla kalhmang tam tak a awm a. Chutih rualin a lam kalhmangah pawh mi leh hmeichhe inkawp a nih \hin avangin a lâmte pawhin a hla thu mila kalpui a ngai \hin. Nula leh tlangval emaw, lam duna chheih dunte chu inchheih vela ng maiin an lam tlangpui \hin.

7. Tlangkawmna

            Hmasang a\angin hnam tinah lam hi hnam nun pawimawh tak a ni a, hnam zia lanna leh zirna pawimawh a ni tel bawk. Mizo hun hluia leh lam kan neihte hi thuk takin a inkungkaih ti ila kan sawi sual awm love. Chung hla leh lam inkungkaih langsarte chu Chawngchen zai kan tih te, Chai hla kan tih leh hla hlui hnuhnung lama chhuak Puma zai leh a siperte hi a langsar zual an ni awm e. Heng huangah hian kan hla hlui tam zawk hi a awm a, kalphung leh hun milin an hla leh zaite chu hming hran pek ni hlawm mah se an zai hun leh cheibawl dan erawh a inang tlang hle.

            Heng chai leh lam hlate hi an nun nena inkungkaih thuk tak a nih avangin hla phuahtu tam berin an phuah a, Chai hlate chu an hunpui hman nena inhmeh lem lo hlate pawh a awm nual tho. Chutih rualin kan pi pute hla ziarang langsak tak chu hla thluk khat ring a tam em avangin a thu ken ai mahin a thluk leh kalhmang kha an ngaipawimawh zawk pawh a ti theih bawk ang.

 

Works Cited

Chhakchhuak, Khama, K.L. Zofate Nunphung Lamdang Zel leh An hun tawnte. Churachanpur. Kawlkhuma, Jion Street, Churachandpur, Manipur. 1993. Print

Chhuanvawra, C. Hmanlai leh Tunlai Mizo Hlate, Aizawl; JP Offset Printer, Khatla, Aizawl. 2011. Print

Laldinmawia, H. Literature Lamtluang. KL Offset Printers, MG Road Tuikhuahtlang, Aizawl. 2nd Edition, 2018. Print

Lalengliana. History of Mizo Hla. Aizawl: Sang\huama, Aizawl. First Edition. 1995. Print

Lalhmuaka. Zoram Thim Ata Engah. Aizawl: Synod Publication Board. 1988. Print

Lalthangliana, B. Mizo Literature (Mizo thu leh hla). MC Lalrinthanga, Aizawl. Second Edition. 2004. Print

Saiaithanga, Rev. Mizo Kohhran Chanchin. Aizawl: Mizo Theological Literature Committee. 1969. Print

Thanmawia, R.L, Mizo Hla hlui, Aizawl. Din Din Heaven, Ramhlun South, Aizawl, 2012, Print.

-      Chuailo Bu 3-na. Aizawl. Din Din Heaven, Ramhlun South 2011. Print

Tribal Research Institute Mizo Lam Thenkhatte. Department of Art & Culture, Mizoram. Aizawl. 2010. Print

Zairema. Rev. Thukhawchang Mi Pekte Hi. Aizawl. Zorun Community, Zarkawt, Aizawl. 2009. Print

Zatluanga. Mizo Chanchin. Aizawl, Mizoram: Directorate of Art & Culture. 1996. Print

Zawla, K. Mizo Pi Pute leh An Thlahte Chanchin. Lalnipuii. Aizawl: 6^th Edition. 1993. Print

 

 

Bibliography

Chhakchhuak, Khama, K.L. Zofate Nunphung Lamdang Zel leh An hun tawnte. Churachanpur. Kawlkhuma, Jion Street, Churachandpur, Manipur. 1993. Print

Chhuanvawra, C. Hmanlai leh Tunlai Mizo Hlate, Aizawl; JP Offset Printer, Khatla, Aizawl. 2011. Print

Doliana. R., Dr. Mizo Nunhlui Leh Hlate, Aizawl: Lengchhawn Press, Aizawl. 1988. Print

Ngurliana, Brig. Pi Pute Hla, Aizawl. Mizoram Publication Board. 2^nd Edition. 2009. Print

Lalbiakdiki, Jenifer. Songs and festivals of the Mizo: A study. A Thesis Submitted to Gauhati University for the Degree of Doctor of Philosophy in the Department of M.I.L and Literary Studies in the Faculty of Arts. web.

Laldinmawia, H. Literature Lamtluang. KL Offset Printers, MG Road Tuikhuahtlang, Aizawl. 2nd Edition, 2018. Print

Lalengliana. History of Mizo Hla. Aizawl: Sang\huama, Aizawl. First Edition. 1995. Print

Lalhmuaka. Zoram Thim Ata Engah. Aizawl: Synod Publication Board. 1988. Print

Lalthangliana, B. Mizo Literature (Mizo thu leh hla). MC Lalrinthanga, Aizawl. Second Edition. 2004. Print

Lalzama, Dr. Mizo Language and Literature, Emergence and Development (Contribution of Christian Missionaries from 1897-1947). KL Offset Printer, MG Road Aizawl. 2017. Print

Lalzarzova. Pum zai/Tlanglam zai leh Mizoram-a harhna inlaichin dan. 'Virthlileng, Volume.5 2013' (Hyderabad Mizo Association's Annual Magazine) web.

Pachuau. Margaret L. Dr. Song and its Centrality in the Mizo. International Journal of English Language, Literature and Humanities (IJELLH), Volume II, Issue III, July 2014 – ISSN 2321-7065. Web

Renthlei, Darchuailova., Lalzuithanga, F.  Lenchawm (A study of Mizo Lengkhawm zai), Govt. Hrangbana College, Aizawl. 2017. Print

Saiaithanga, Rev. Mizo Kohhran Chanchin. Aizawl: Mizo Theological Literature Committee. 1969. Print

Sailo, Lalthangfal. Lunglai Hnemtu (Thu leh hla leh vei zawngte). Aizawl. Gilzom Offset, Electric veng, Aizawl. 2011. Print

Thanmawia, R.L, Mizo Hla hlui, Aizawl. Din Din Heaven, Ramhlun South, Aizawl, 2012, Print.

-      Chuailo Bu 3-na. Aizawl. Din Din Heaven, Ramhlun South 2011. Print

Tribal Research Institute Mizo Lam Thenkhatte. Department of Art & Culture, Mizoram. Aizawl. 2010. Print

Zairema. Rev. Thukhawchang Mi Pekte Hi. Aizawl. Zorun Community, Zarkawt, Aizawl. 2009. Print

Zatluanga. Mizo Chanchin. Aizawl, Mizoram: Directorate of Art & Culture. 1996. Print

Zawla, K. Mizo Pi Pute leh An Thlahte Chanchin. Lalnipuii. Aizawl: 6^th Edition. 1993. Print