Mizo Hla Hluia Satire Ziarang

Mizo Hla hluia Satire Ziarang

(Satire in Mizo Folk-Song)

1. Thuhmahruai

            Mizo hla hluia thil langsar tak pakhat chu intukna hla kan tihte hi an ni a, hei hi English poetry \hen hrang zinga satire an tihte hi a ni thei awm e. Heng hlate hi Mizo hla hlui hmasaah te khan langsar takin thil hrang hrangah a lo lang tawh a ni. Mizo thawnthu hmasa “Thlanrawkpa khuangchawi thawnthuah khan intukna hla chang kan hmu a, hei hi a hmasa ber a ni mai awm e” (Thanmawia 685). Buiin pangpar a beh chu a mawipui ve loh avangin hla hmangin an phuah el a; hetiangin:

                        Thlanrawkpa khuangchawi niin e,

                        Buipuiin pangpar a beh e;

                        Mawina nei lo, \hatna nei lo, su bui bui

tiin Mizo thawnthuah kan hmu a. Chawngvungi leh Sawngkhara thawnthua dar huai chungchangah te, Rahtea thawnthuah te, Thailungi thawnthuahte pawh intukna hla ziarang  kan hmu nual bawk.

            Mizo hla hluiah hian a chhuah kum leh hla kalhmang a zirin \hen hrang hrang a awm a, chutiang hlawm zingah chuan a hran hlaka lak tur awm lo mah se, hla hlui hlawm hrang hrangah hian intukna hla hi a lang ve fo; hei hi Mizo zepui pakhat ang pawha sawi theih a ni. Intukna hlaah hian fiamthu leh nuihpui theih tur a langsar a, Mizote hi fiamthu ngaina leh uar tak hnam kan ni a, chu’ng chu kan hlaah pawh hian a langchiang hle a ni.

            Satire chungchang ziahna leh a kalphung bakah Mizo hla hlui lama thlirna hrang hrang a \hahnem viau tawh a; a \hen dan erawh  a mumal lutuk lo. He paper-ah hian English literature ze\huang \hen zul deuhin thlir dan thar chhawp chhuah kan tum dawn a ni.

2. Satire awmzia hrilhfiahna:

Satire tih hi Latin \awng sature tih a\ang lak a ni a, hla thu chawhpawlh (poetic medley) tihna a ni a; hun hmasa lamah chuan “chawhmeh chawhpawlh emaw thei hrang hrang inpawlh” sawi nan an hmang \hin (etymonline.com). Heta \ang hian Greek \awnga satirize tih te, satiric tih te a lo piang a, chu chu Mizo \awng chuan tiel, elsen, deusawh (JF Dictionary) tihna a ni. Literature huangah chuan Roman thuziak mi Gaius Lucilius hi awmze neia satire hmang hmasa ber nia sawi a ni a (britannica.com); Roman-ho hi Satire chhing hmasa pawl nia sawi an ni bawk. Greek lemchan thawnthu ziak thiam Aristophanes pawh hetiang hawia hla phuah hmasa pawla sawi a ni bawk(Hringnun 60). English thu leh hla huangah chuan AD 16 na hun a\ang hman \an tawh nia sawi a ni thung.

 RL Thanmawia chuan, “Mi mal nun emaw, kohhran leh khawtlang thil emaw, ram hruaina lam thil a ni emaw-a hlemhlêtna leh thil duhawm lote hnualsuatna leh demna \awngkam, thil âtthlâk a nihzia lantir tura hmusit tak leh deusawh taka tihelna hi satire chu a ni”(684) tiin a sawi. Dr. Laltluangliana Khiangte chuan, “Demkai hnualsuatna \awngkam, sual leh âtna te, mawlna leh hlemhletna thil hmusit leh demna \awngkam a ni” (Laldinmawia 65). MH Abrams pawhin, “Engthil emaw atthlak tak, a nihna lantir tura hmusitna emaw, hnehsawhna emaw, deusawh leh hmusit taka hnawlna emaw, nuihzatbura hmanna \awngkauchheh a ni”(65) tiin a sawifiah ve bawk.

Lalnunpuia Renthlei chuan Hringnun lehkhabuah hetiang hian satire  chu a sawifiah bawk-

Satire' tih hi Latin \awnga ‘satura lanks' a\anga lokal a ni a, a awmzia chu thu-leh-hla, mihring emaw pâwl emaw hmêlhemna lai a deusâwh zawnga phochhuahna tihna a ni. Satire (thuhlael) chuan sualna te, hmelhemna te, thil âtthlák leh chèt dân leh chîn dân phung danglam deuhte a tarlang \hin. Chung thil tha lo leh hmêlhem laite chu nuihzatbûrna \awngkam te, a ngial a ngana thil va deusawnna \awngkam (sarcasm) te, a vehthlem zawnga thil va deuna tawngkam (irony) te hmangin phuahel a ni thin. Thuhlael thiltum chu vantlang nun leh mimal nuna thil felhlel laite siam\hat leh fuihthat hi a ni. (60)

            Satire hian thu leh hla hmangin mimal, khawtlang, kohhran leh ram inrelbawlna thlengin a bei a, siam \hat hna a thawk thei a; a hlimawm rualin a dawngtu tan erawh a ngeiawm ru riau thei thung. Hei hi literature hlutna pawimawh tak pakhat chu a ni pawh a tih theih bawk ang.

3. Satire \hen hrang hrangte:

            Satire hi hlawm lian deuh deuh pahnih- Personal leh Impersonal satire-ah te \hen theih a ni a; chutih rual chuan a zirchikna huanga \hendan tlanglawn kawng dangte pawhin \hen a ni bawk.  Heng \hen hrangte hi a chhing chhuaktu leh an kalpui dan mila hming pek mai niin a lang; a thuken leh kalpui a zirin kawng dang deuh pawhin a sawi theih ang. Personal, Religious, Political leh social satire te hi Mizo hla hluia satire zirchikna lam kan hmuh \hin tlanglawn deuh deuh chu a ni. Tun \umah hian English literature huanga \hen dan tlanglawn leh hlawm lian deuh deuh hmangin Mizo hla hluia satire te hi a tlangpui lo belchiang dawn teh ang. An chanchin leh thu leh hla zawng zawng erawh kimchang taka ziakna a tam a, kan tarlang vek thei kher lo ang.

3.1: Horatian Satire

            August-a hunlaia Roman poet ropui Horrace (65-8 BC) hmingchawia phuah a ni a; amah Horrace-a hi satire chhing hmasatu a ni nghe nghe. Horatian satire hi khawtlang leh mimala dik lohna hlimawm zawnga hailanna a ni ber a; thil nuihzatthlak, fing ru tak si a ni. A thu kal dan a fingin belhchian a dawl a, mihring nun tarlanna fiah leh hlimawm tak a ni.

            Saikutin an khaw kawtchhuaha sahlam, ral lu hmu ngai lo chu hla hmangin heti hian a phuah el ta siah mai a:

                        Ral in rel e, kai lo lalnema te,

                        In zuat sual e, chhuahtlang thing lenbuang

 

                        In zuat sual e, chhuahtlang thing lenbuang

                        Chhunlum liak-ak chhunrawl a vai e

tiin an khaw tlangvalte chu an nihna a hailan sak a; tlangvalte tan chuan nuihpui har viau mah se, mi dang tan erawh thudik nisi, nuih tiza deuh tur a ni.

            Sakhaw thar lo luh hnua sakhaw hlui lama lungleng leh kristian la ni lote chuan Pathian thu awihte rawngbawlna pakhat buhfai\ham an khawn \hin chu hla hmangin heti hian an phuah el a:

                        Immanuela a \am em ni?

                        Chawlni tlaia in buh\ham khawm zozai hi,

                        Ei seng hian kei zawng ka ring nem le!

tiin.

 

Mizo khawtlang nun hluia thil pawimawh leh induhsakna pakhat zu chu sakhaw tharin a duh loh berte zinga mi a ni a, a aiah thingpui an han hmang a; chungte chu Pathian thu awihloho tan chuan \an hmun rem a lo ni zel a; heti hian an zaipui a:

                        |in zu leh \in zu a dang mang e,

                        Nangni \in zu luarbawn thingpui hnahthel ro,

                        Tirhkoh mei bula’n a dawt kuang kuang

an han ti a, a dawngsawngtu tan pawh nuih tiza tur a nih theihna a awm awm e, chumi phenah chuan sakhaw hlui leh thar insualna boruak leh, Mizo pa tana sakhaw thar landan chiang takin kan hmu thei a ni.

3.2: Juvenalian satire

            Juvenalian satire hi satire hlawm zingah chuan a khawng leh thawm na ber niin an sawi \hin. He satire hi lungawi lohna leh thinrimna lam rawngkaia mi dangte kahna a ni ber. Roman satirist hmingthang tak Juvenal (55-138 AD) hmingchawia phuah niin he satire hi sawi a ni. a, Juvenal-a hming tak chu Decimus Junius Juvenalis tih a ni duah mai. Amah hi thil dik lo nia a ngaihte huaisen taka hla hmanga deu \hin mi a ni a; an hunlaia Rom lalrama eirukna leh dik lo tam tak dotu lian tak a ni a, mi hausa tak ni si, hniam tak, tluangtlam leh mawlmang taka khawsa niin an sawi(Highet- Encyclopædia Britannica). Juvenalian satire-in a uar ber chu khawtlanga dik lohna hailang tura  deusawnna lam a ni ber. Thil engpawh a chhe zawnga thlirna (pessimists) lam te, elsenna (irony) leh \awngelna (sarcasm) a langsar a, nuihna tur lam leh thil hlimawm erawh a tlem deuh niin an sawi. Ram rorelna leh inrelbawlna kawnga intukna (political satire) lamah hian a langsar hle bawk("Juvenal." Wikipedia).

            Mizo hla hlui lamah pawh hetiang thil hi kan hmu tam khawp mai. Chhim leh hmar Indona(1849-1855) hial thlentu Vuta’n Lalpuithanga a deuna hla chu hetiang hian a zaipuia:

                        Buanhmun pai ang pawm tawh hnu,

                        Chengteah lam ang let e,

                        Lalpuithang lema,

                        A lema lema

tih te hi  kei ka ni inti, lal ve bawk tan chuan pawm zam mai a harsa dawn em a ni. Chutiang bawkin Darpawngin Thentlang an awm laia Zadeng lal Dengpuii hla hmanga a beihna te hi a dengkhawng hle, an kel thubuaia thurem dik lo lutuk chu hla hmangin heti hian a elsen a:-

                        Dengpui ka var iti,

                        I vangkhua chung si-ar zatin,

                        Pawlin ka ring lo ve

tia an khaw lalnu meuh a chhal ngam hi a huaisen khawi mai. A huaisen em em chhan hi dika a inhriat vang a ni a; thil dik lo a duh lohna hi a ropui hle. Laltheri’n a ngaihzawng Chalthanga laka a nu leh pa, unaute chetdan duh lova hla hmanga a beihna te hi a hla thu ang ang pawh hian dengkhawng tak a ni:

            Bawmzo ral mah dar ang chhai ngam lo,

            Belzu kungah ka di Chalthanga, chawng sa iang sat e,

                        Ka chun leh zua suihlung in mawl lua e,

                        Kan sumtualah Thangdang thlunglu hawiten’n in tar le

A chhungte chu ‘mawl’ tiin a deu siah siah mai a, a huaisen khawp mai; a chhungte rorelna  dik lo chu na takin a khak a ni. Hetiang hi satire nihphung pawimawh tak pakhat a ni reng \hin.

3.2: Menippean satire

            Menippean satire hi Greek philosopher tawh khirh zet mai Menippus hmingchawia phuah a ni a; Aristophanes kha a vawrh lartu langsar tak niin an ngai. Menippean satire hi thawnthu lamah hman tlanglawn a ni deuh naiin, hla lamah pawh mimal nun, a bikin an rilru put hmang lam elsenna rawngkai phuahnaah pawh hman a ni bawk. Mahni inngaihlu tak te, khaw hmu lo leka mahni pawl \an chi te, thil atchilh hma em em ang chi leh mi phur hluai ang chite hla hmanga deuna hi Menippean satire kalphung langsar ber a ni (oxfordreference.com). Kum zabi pakhatna hunlaia a chingchhuaktu Rom mi, Marcus Terentius Varro hming chawiin Varronian satire tiin an sawi bawk \hin (Abrams & Harpham 274).

            Mizo hla hlui, a bikin hla hmanga mimal inbeihna lamah hian heng thil hi kan hmu langsar hle. Sakhaw thar lo lan hnu, party politics kan hmelhriat hnua kan hla hlui kalhmanga hla phuah awm leh zelah pawh thil langsar tak a ni bawk. Hla hlui chhuak hnuhnung deuh, Awithangpa leh Diriallova te inbeihna hlaah chuan, Dirialova chuan heti hian a aukhum a:

                        Thim pawh zing se Awithangpa chu

                        Zawng mei bulah a chang awm e,

                        Dirialova erawh kulva thlehhniarah

                        Ropui rel reng renga nilenin

tiin a a phuah el a; Awithangpa pawhin heti hian a chhang ve nghal a:

                        Kulva thlehhniar i chang rua lo,

                        I sakhmelin kawr ngau hmelchhia a iang e,

                        Nu chuan \ing bel anga dum zel zul(696)

tiin a lo phuah let ve siah bawk. Chai hla hmingthang tak Lavunga zaiah pawh Lianpuia leh a thurualpuiten Farzawl lal Lalvunga an beih khan, a farnu khan tlan turin tur mah se, Lalvunga erawh chuan tlanchhiat chu a lo tum der lova, a thih phah ta hial a; chu chu hla hmangin heti hian an phuah el ta a:

                        Lalvunga’n ka lian a ti, Farzawl a luah,

                        A luah sual e, changsial sawmthum an la e

tiin. Thlanrawn lal Thanchhuma chuan a pasal\ha Phunthanga chu khaw hrang hrangah chhiah khawntir \hin a, Lallula hoten an nuai chimih hnua hla hmanga an phuahnaah chuan-

                        Phunthanga’n saingho ngen e,

                        Thanchhuma’n kawlpui bun e,

                        Miau miau taka aw e

I lal lua e Phunthanga,

                        Khua tinah chhiah i lawr e,

                        Sat mai zel a aw e,

tia elsenin  rallu an lam mup mup tih kan hmu bawk(689).

            Mizorama Political party hmasa ber Mizo Union a lo din khan lal ban kha an thupui ken pawimawh tak a ni a, chu chu hla hmangin an auchhuahpui a:

                        Bai thak arva, artui khawn leh,

                        Lal hnungzui reng ka ning tawh;

                        Kawltu chawi lai daltu an ni,

                        Sazai lian pui pui an ni

tiin hla hmangin Mizo Union thuken leh an pawl chakna tura an ngaih chu an aupui nasa hle a ni. Heng bakah hian Political satire kan tih ang hi kan ngah fu a, pawl dang zawng dik lo ta veka ngaihna leh demna te, mahni dinhmun insawhnghehna hlimawm ru tak si kan nei nual a ni.

4. Tlangkawmna:

            Hla leh mihring nun hi inzawm tlat a ni a, chu chu kan pi pute hlaah pawh hian chiang takin a hmuh theih. An thinrimna emaw, an thil pawm loh leh duh loh zawng te chu an puangchhuakin, deusawnna rawngkaiin hla hmangin an lo phuah chhuak \hin. Hei hi thu leh hla huanga hnampui zawkte pawhin an lo chin \hin a ni a, chu chuan kan pi pute hla hlui ropuina leh huapzau zia a tarlang tel bawk ang.

            Khawtlang nunphung leh thil thleng tarlanna langsar tak chu satire-ah hian hmuh theih a ni. A hunlai khawvel, an nunphung leh ngaihsan zawng thlengin fiah takin tarlan a ni \hin. Khawtlang inrelbawlna leh kalphung thlengin kan hlate hian min tarlan sak \hin. Chumi kawngah chuan hlimawm tak phenah hian intaina emaw, indeusawnna emaw thutak thuk takin a inphum ru reng \hin.

Intukna hlate hian nghawng lian tak tak a nei a, Mizo chanchina thil thleng chhinchhiahtlak tak takte hi hla vanga thleng a awm nual reng a ni. Chutih rualin intukna hla zawng zawng hian nghawng a nei vek lem lo tih pawh kan hmu thei awm e. Pi pute zai kalhmang hlawm hran deuh emaw, thluk leh zai hran deuh pawh awm chuang lovin, hun hrang hrangah satire hian bu a lo khuar ve zel a, tlar hnih hla a\angin sakhaw thar pian hnu fe, politics kan hmelhriat hnu thlenga Mizo hla hluiah satire zia keng hlate hi a lo inphum \ul mai a, Mizo literature huangah hian hmun pawimawh tak a la luah zelin a rinawm.

 

Works Cited

“Juvenalian satire” The Editors of Encyclopaedia Britannica. Encyclopædia Britannica. https://www.britannica.com/art/Juvenalian-satire. Accessed on January 21, 2020

“Literary Terms.” Literary Terms. 1 June 2015. Web. <https://literaryterms.net/>. Access on 21 Jan. 2020.

“Satire.” Merriam-Webster.com Dictionary, Merriam-Webster, https://www.merriam-webster.com/dictionary/satire. Accessed 21 Jan. 2020.

Abrams, M.H. A Glossary of Literary Terms. Macmilan Publication India Pvt, Ltd. 2009. Print

Chhuanvawra, C. Hmanlai leh Tunlai Mizo Hlate, Aizawl; JP Offset Printer, Khatla, Aizawl.2011.Print

Coffey, Michael, and Costas Panayotakis. "Menippean satire." Oxford Classical Dictionary.  March 07, 2016. Oxford University Press. Date of access 9 Mar. 2020, <https://oxfordre.com/classics/view/10.1093/acrefore/9780199381135.001.0001/acrefore-9780199381135-e-4112>

 Diniejko, Andrzej. Dr. Menippean Satire as an Ancient and Modern Literary Genre. University of Warsaw; Contributing Editor, Poland. http://www.victorianweb.org/genre/menippean.html Access on 22nd Jan. 2020

Laldinmawia, H. Literature Lamtluang. KL Offset Printers, MG Road Tuikhuahtlang, Aizawl. 2nd Edition, 2018. Print

Luke Edly. Understanding Different Types of Satire. © 2017 Luke Edley. Available under the Thanet Writers Education Policy. https://thanetwriters.com/essay/technicalities/ understanding-different-types-of-satire/ Access on 21 Jan. 2020

Renthlei Nununa, Hringnun (Poetry thlurbingna leh poem hrang hrang). Mizoram Publication Board, Aizawl.

Thanmawia, RL. Mizo Hla Hlui (Mizo Folk Songs). Din Din Heaven, Ramhlun North, Aizawl. 2012. Print

Wikipedia contributors. "Satire." Wikipedia, The Free Encyclopedia. Wikipedia, The Free Encyclopedia, 3 Mar. 2020. Web. Access on 21 Jan. 2020.