HUN LAIHAWL (1920-1940) A MIZO THU LEH HLA

 KAIHLEK HLA

Kaihlek hla hi mi \henkhat chuan Kaihlek Zai an ti bawk, mah se kan pi leh pute hla kalhmang a\anga teh chuan Kaihlek hla tih hi a dik zawk awm e. A chhan chu hmanlai kan hla neih te kha a phuahtu hming chawiin a awm ber a, kaihlek hla erawh chu hla thluk awmsa hmanga phuah a nih avangin leh a phuah hmasatu te pawhin a thluk hran an chher loh avangin ‘Kaihlek Hla’ tih hi a dik ber mai awm e.

Kristianna in kan ram a rawn thlen hnu khan nasa takin kan hnam nun min thlak sak a. Kan zai leh lam a nghawng nghal a, kan nunphung tam tak kan kalsan a ngaih phah a. Chu chuan zu leh sa nena kan chai leh kut ni vangthla thlengin a nghawng ta zel a. Nula leh tlangval inkara hla hmanga inlemna hla pawh chuan ‘khawvel thil’ nihna  a ken tel miau tawh avangin a lang a paua sak leh phuah ngam an awm ta meuh lova. Khang kha kohhran in a do mai bakah, ringtu hmasa te thil bansan leh duh loh ber a ni.

Chutiang dinhmuna an awmlai chuan an nun leh rilru a langin danglam angin lang mah se an chhung rilah erawh khang hla khan rilru a la luah reng tho a. Chung rilru a\ang chuan sakhaw thar hla chhuak thluk milin hla an siam rem ta a, nula leh tlangval in lemna hla leh, an lunglenna te chu chung hla mil chuan an phuah khawm ta a. Chu chu kaihlek hla lo pian chhuah dan chu a ni.

Kaihlek hla hi kum 1915-1917 vela chhuak niin B.Lalthangliana chuan a sawi a. RL Thanmawia chuan kum 1919 hnulama chhuak niin a sawi ve bawk. Kaihlek hla lar vanglai tak chu Mizo lengkhawm hla thar rawn chhuah hunlai, kum 1920-1930 inkar hi a ni awm e.

Kaihlek hla an phuah chhan hi kawng thumin a sawi theih a.

1.            Sakhaw thar tih elna: Kristianna in nasa takin ram a la deuh deuh a, kan hnam nunphung leh tih dan tam tak bansan a ngai ta zel a. Chungah chuan mi tam tak chuan Sakhaw thar vawn hrehin nasa takin an do ve bawk a. Puma zai rawn chhuak te pawh nasa taka vawrh lar anih khan kristianna \han kha a ti \hu hle a ni. Pu Buanga meuh pawhin kaihlek hla sawifiah nan hian kristian sakhaw tihbawrhbanna leh nuihzatburna a ni tiin a sawi hial a ni. Kaihlek hla hian kristian hla thluk awmsate chu her danglamin an hla thu thlengin Kristian te elsenna leh deuna \awngkam an hmang a ni.

An hla pakhat lo tarlang ila:                                    (Kaihlek Hla)

         Kulhpui bulah ka awm renga                             Belpui bulah ka awm reng a,

         Ni eng lo chhuah nghakin,                                 Haileng no khat nghakin,

2.            Kohhran Upa Bum nan: Zorama kohhran rawn indin chho kha a fir em em a, huat leh thiang lo a ngah em em. Pathian fakna hla ni lo zawng zawng chu khawvel hla, ring lo tute hla tih vek a ni a. Chutiang sa ru an hriat pawh kohhran dan pawnah hnawlin an phuar deuh nghauh nghauh zel a ni. Chutianga an awm lai chuan fakna hla ringawt chu nin chin an lo nei a, tin nula tlangval kara induhna chuan thu maia sawi fel zawhloh a nghah ve bawk nen kaihlek hla hmangin kristian hla tha tak tak chu thumal pahinh khat lek thlakin inlemna hlaah an chhuah \hin bawk. Entir nan-

Aw khawiah nge chhandamtu chuan              Aw khawiaha nge \hadangin chuan,

Lungngaih hrehawm a tuar?                           Nipui sensa a tuar?

3.            Lengzem hla rawn tharthawh lehna: Kaihlek hla rawn chhhuah chhan pawimawh tak pakhat chu lengzem hla rawn irhchhuahna anih avang a ni. Pi puten an hla hluiah lengzem hla hmangin an rawn phuah chhuak a, chung chu sakhaw tharin a rawn chim hnan takah khan a reh ta hmak a. Mihring rilru leh nngaihtuahna ah khatiang hla lam kha a la awm miau avangin a rawn lanchhuah lehna chu kaihlek hla a lo ni ta a. Tichuan kaihlek hla hnulamah chuan lengzem hla tha tak tak a rawn pian chhuah phah ta a ni.

 

 

LENGZEM HLA (1919-1965)

Lengzem hla hi kaihlek hla nen hian kalkawp tlat a ni a. Lengzem hla rawn chho zel tur hi kristianna in a rawn dan beh tak hnu khan Kaihlek hla hmangin a rawn lang chhuak leh a. Chumi hnu chuan Lengzem hla hi a rawn piang ta a ni. Kawng \henkhata sawi dawn chuan lengzem hla hi kaihlek hla hrin chhuah tih pawhin a sawi theih tho awm e.

Lengzem hla kan tih hi nula leh tlangval inkara induhna, inthlakhlelhna leh lunglenna sawi chhuahna hla a ni ber a. Sakhaw thar duh loh anih avangin heng hla lama kan hnuhma ngaihtuah chuan a chhuah har hle a ni.

Lalzuithanga

Hawrawp kan neih hnua Mizo lengzem hla chhuak hmasate hi sap hla thluk mila tho duan leh siam a ni. Dura Chawngthu chuan kum 1926 khan Culcutta BE(Civil) a zir laiin, Culcutta khawpuia a len \um sap nula Marry Carrolic zai a hria a, mawi a ti hle a. A chhenna hmun athlen chuan “Tleitirah Tleitiri” tih hla hi a phuah ta a ni. He hla hi chang 4 nei hla, hla thu mawi leh thluk in mil taka phuah a ni. Hemi hnu hian Vankhama chuan sap hla thluk hmangin hla tam tak a rawn phuah chhuak ve bawk a. Tin, Lalzova pawh hian sap hla thluk hmanga lengzem hla phuahtu zingah hun hmasa lam a hauh bawk.

Tin, Lalzuithanga hi mizo irawm chhuak lemzem hla phuahtu hmasa a ni bawk. A ni hian kum 1932 khan “Nang Nen” tih hla chang thum nei a phuah a. Hemi rual tho va phuah nia sawi Vankhama hla nen hian Mizo lengzem hla, kan irawm chhuak ngei kan neih hmasa an ni awm e. Tin, Lal\anpuii Sialsuk pawhin kum 1934 khan lengzem hla hi ama irawm chhuak ngei hmanga thluk leh hla thu hmangin a phuah ve bawk.

 

HNAM HLA (1919-196…)

Mizo hnam hi kan pi pu a\ang tawhin hmun hrang hranga awm darh \hin kan ni a. Khua leh khua indo a, ram leh eng ilo inchuh reng \hin kan ni a. A hu hova khawsa \hin kan nih loh avangin ram leh hnam rilru hi kan pu har a tih theih ang.

Mizo mipui hnam rilru put tirna lama hla kan neih hmasa ber pawh Zosapthara hla phuah a ni tlat! Zosapthara hian kum 1903 khan “Mizo kan ni lawm ilangin” tih hla a phuah a, hei hi Mizo hnam rilru pu tura kan hla neih hmasa ber a tih theih awm e.

Heta \ang hian Thanga, Mizo zinga lehkhathiam hmasa leh phai lama lehkha zira awm chuan Shillong-ah kum 1908-1910 inkar hian hnam hla pahnih a rawn phuah ve ta a. Heng hlate hi Mizo irawm chhuakah chuan hnam hla kan neih hmasa ber an ni. Thanga hla pahnihte hi “Mizoram, Mizoram ka thlahlel che” tih leh “Mizo fate u, finna zawng ula” tih hla te a ni a. Ram/hmun dang a\anga zoram ngaihawm zia leh, a thlakhlelhna te, a chhunga cheng zofate a fuihna hla leh Zoram tana a \hahnem ngaih zia a tarlanna hla a ni.

He mi hnu hian a reh vang vanga, kum 1926 khan Mualianpui lal, Lalsailova chuan Kristian Tlangau chanchinbu ah “Mizo Ram, Hnam Insuihkhawmna” tih thu a ziak a, chumi tawp lamah chuan hla pakhat “Mizo Ram hi lawmin au rawh se” tih chu a dah tel bawk a. Amaerawhchu a thluk dah tel ani loh vang nge hriat zui a hlawh ta vak lo. He mi hnu hian Liandala’n kum 1934 vel khan Zoram mawi zia fakna lam a phuah ve leh bawk. Heng hi hnam hla zinga chhiatr harsa deuh mah nise ram leh hnam rilru min put tirtu anihna lai chu a awm ve bawk awm e.

Rokunga (1914-1969)

Hun a kal zel a, tlem tlemin hma kan sawn hret hret a. Kum 1939 khan Kaphleia, Culcutta lehkha zir mek chuan Zoram Nuam tih hla a rawn phuah ve leh a, a hnu kum 1939 ah Zoram Ka ram tih a rawn phuah ve leh bawk. Zoram ka ram tih hlaah hian Mizoram a ngaihhlutna leh a hmangaihna te, midang hnuaia kun a phal loh zia leh kan pi pute tlawmngaihna chhawm tura min duhna te a tarlang a. |hangtharte fuihna a zep tel bawk a ni. Kaphleia \hahnem ngaihna chuan zung a kaih zel a, Rokunga chuan kum 1944-ah Raltiang I kai ve ang tih a rawn phuah ve ta a. He mi hma hian Zawlkhawpui |henna tih te pawh a lo phuah tawh bawk. Rokunga hi hnam hla phuah kawngah chuan a thawhhlawk ber hial awm e tih theih a ni. Kum 1947-a a phuah, “Aw nang kan lal kan Pathian” tih hla phei chu Mizo hnam hla ang hiala ngaih leh cheibawl ani hial a ni. A hla tam tak te hi hnam a veina lam a ni hl
awm a, tun thlenga kan la sak tam ber leh kan hnam hla neih ropui ber ber te hi a kut chhuak te an ni hlawm.

Hun a lo kal a, ram inrelbawlna inthlakin politic min hmelhriat tir \an a. Chutah chuan hnam rilru a rawn lian ta zel a. Rokunga hla tam tak pawh chuan hriat zui a hlawh ta zel a. Hnam movement hial kan lo nei a, hei hi a vawrh chhuak darhtu langsar tak chu heng hunlaia hla chhuak te hia atih theih awm e. Lal\anpuia, Sialsuk chuan kum 1964 khan Kan ram hi kan ram a ni tih hla a rawn phuah ve leh bawk a. Heng hian Mizo hnam rilru nasa takin min put tir a ni.

Mizoram buai hnu, kum 1966 hnulamah hian hnam hla chhuak a vang leh ta pharh mai. MNF rammu ten an mahni hun tawn phuahna leh an inchawhphur nana an phuahte chu awm bawk mah se lar tham leh, hnam pum huap hla chhuak a vang hle. Capt LZ Sailo chuan “Insuihkhawm leh zai I rel ang u” tih hla a phuah a, hei hi tun thleng pawha hnam inpumkhatna kawnga kan hla neih hlu tak leh kan sak tam a la ni reng a ni.

 

HLA LENGLAWNG (1919-1965)

Mizote hi zai leh lam ngaina tak hnam kan ni a. Kan pi pute hun a\ang tawhin hmun ropui tak a luah a, hnam upa zâwkte tluk chiah lo mah ila kan hnam mil chuan thu leh hla pawh kan nei ve nual ta. Chu’ng zingah chuan hla lênglawng kan tih hi hlawm pawimawh tak zinga mi a ni awm e.

Mizo hla ruangâm hi hlawm lian tak tak pathumah \hen theih a ni a. Pathian fakna hla, lengzem hla leh Hla lênglawng -ah te \hen theih a ni awm e. Hla lenglawng huang chhungah hian sakhaw lam hla leh nula tlangval inngaihna hla (lengzem) tih loh zawng hi chu a leng tel vek mai awm e. Hla lênglawng huang chhung hi a zau hle a, ram ngaih hla kan tih te, thilsiam hla kan tih leh khawtlang nunphung siam\ha tur lama hla phuah te pawh a tel thei ang. Tin, mi \henkhatte chuan khuarel hla-te pawh an ti ve bawk.

Mizo lengzem hla lo chhuah \an hnu kum 1930 chho a\ang khan hla chi hrang hrang a rawn pian \an a. Hla lenglawng pawh hi he mi boruak chho a\anga in\an hi kan ti thei ang. Amaherawhchu, thawm nei lian deuh ber erawh Serkawn Concert, Serkawn sikul zirlai leh zirtirtute buatsaih \hin kha a ni awm e.

Kum 1932-a Serkawn sikul enkawltu HW Carter-a khan Serkawn concert hi a buatsaih \hin a. August thla tawp lamah emaw September thla tir lam hian an nei deuh ber \hin. Serkawn concert hi kum 1946 hmalam zawngah khan chuan kum tin chatlak miah lovin ang hmang \hin. He hunah hian sakhaw lam hla ni lo hla \ha tak tak a rawn chhuak a, heng hi ‘hla lenglawng’ kan neih \anna tiin a sawi thei awm e. Serkawn concer-ah hian \umkhatah hla sawm vel zel an nei \hin a. Heng an hla tr hi zirtirtute’n uluk takin an buatsaih \hin. An hla thu ken pawimawh tak tak te chu- Zoram mawizia fakna te, zirlai nun leh in\hian \hatna te, chhungkaw inlaichinna leh khuarel lam hla te a ni hlawm.

Serkawn concert-a hla phuahtu langsar te chu- Lalmama, Liandala, Chhuana, Zadala, Sel\huama, Hlun\huam leh midangte an ni. An ni hian hla chi hrang hrang an phuah a, zai rem tura thluk nei hmanga phuah ni hlawm mahse an hla te hian belhchian a dawlin, tunlai hun thleng pawha hlahril(poetry) \ha kan neih kan ti thei ang.

He huna hla chhuak lar zual deuh deuhte chu Liandala hla Pi pu chhuahtlang, Kan chuanna tlang, Zoram pangpar tih te; Chhuana hla Lentu sawmfang hring nghil nghial e, Kawltu chawi, Chhura leh Naa; Lalmama hla |o haw, Virtli leng tih te leh hla dang tam tak a chhuak nual a ni.

Tin, Vankhama hian hla lenglawng huang chhungah chuan a thawh hlawk hle. Kum 1938 hnulama a phuah Rimawi Ram tih te, kum 1947 khan Khawtlang lunglen tih hla a phuah leh Tlaizawng par 1949-a aphuahte hi hla lenglawng kan neih hmasa, \ha tak tak a ni hlawm. A ni bakah hian Damhauva, Rokunga leh Romani te pawh hla lenglawng phuah kawnga thawhhlawk tak an ni hlawm.

 

THUTLUANG/THU ZIAK (PROSE)

Thutluang huangah hian \awng tluang pangai hmanga thuziak a huam deuh a, kum 1919-1966 inkarah hian thutluang ziak tam tak awm mah se ram pum huapa hriat leh a langsar deuh chauh kan chhui zui thei awm e.

Mizo chanchin thutluang pangaia ziak hmasa ber Pastor Vanchhunga hian Mizo ten hawrawp kan neih hnu, kum 1915 khan upa zawkte hnen a\anga a hriat Mizo chnachin chu a lo ziak tawh a. Hei hi kum 1916 October thlaah Kristian Tlangau chanchinbuah chhuah a ni a, a hnu kum 1955 khan lehkhabu puitlingin Lusei leh a vela hnam dangte chanchin tih chu chuah a ni nghe nghe. He thuziak phek 10 vel laia chhah, Mizo chanchin kan neih hmasa ber ni bawk hi tun hnu tleng pawha kan la rin leh kan historian te pawhin an belh ber a ni. He lehkhabu ah hian Lusei inthlah chhawn dan leh chi peng hrang hrang te, hla hlui tam tak leh hmanlai mizo nun tam tak a ziak lang. Amaherawhchu lehkha thiam lo an nihna leh a kalhmang la hre lo annih avangin mumal taka remkhawm leh hriatthiam har tak tak a awm nual bawk.

Rev Liankhaia hian kum 1926 khan Mizo Chanchin inziaksiak ah lawmman pakhatna a lo la tawh bawk a. Tichuan, kum 1938 khan a bua chhuahin a hnu leh zelah siam \hat ngaite siamtha zelin tunlai hun thlenga lehkhabu rotling tak a la ni mek. Tin, hei bakah hian Mizo Awmdan hlui kum 1970-a a ziah te, Arsi chanchin kum 1975-a a ziahte pawh thutluang ziak kan neih hmasa leh pawimawh tak anni bawk.

NE Parry, Mizorama bawrhsapa lo awm hian Makthanga leh Chhunga te puihna hmangin Mizo Dan la khawmin kum 1927 khan a buin an chhuah a, hei hi thutluang zinga Mizo lehkhabu pawimawh tak a ni bawk. He lehkhabu hi Mizoram khaw hrang hranga lal te rorel dan leh kalphung lakkhawm a ni a, a hnu leh zela a \ul anga siamrem a ni zela hei hi tunlai hun thleng pawha kan la hman a ni.

Sorkar lam buatsaih Rorelna Thupek kum 1940 a tih chhuah te, Pastor Chaliana ziak, Chhim bial kohhran chanchin (1944) leh Hmasang Mizo Awmdan (1949) te pawh thutluang huanga lehkhabu kan neih hmasa a ni a. Rev Saiaithanga ziah, Mizo Kohhran Chanchin kum 1969 a chhuah te, Kum 1950 bawr vela ziah VL Siama’n Mizo History a ziah te leh Nuchhungi’n zirlaibu atana a buatsaih \henkhatte pawh hi thutluang hmahruai zingah chhiar tel theih a ni awm e.

 

ESSAY

Essay hi thutluang zingah tel thei mahse tlema kalhmang dang deuh a ni a. Thutluang pangaia ziak, a ziaktu ngaihdan leh inzirtirna lam keng tel, bengvarthlak inzep tel thuziakte hi he mi huangah hian kan dah thei awm e.

Mizo te essay puitling kan neih hmasa ber chu “Thlirtu” Kaphleia ziah hi  a ni. A ni hian kum 1939 khan Durtlang damdawiina TB natna veia a awm laiin a ziak a. He thuziakah hian Mizo ram leh hnam a hmangaih zia leh chumi atana tha thawh tura theihna a nei lo chu pawi atih zia te, Mizoram nawmzia leh kan khawsak dan chanchin te, kawng\ha zawk inkawhhmuhna leh fuihna thu \ha tak tak a tarlang a. Mizo essay hmasa ber mah nise sawisel ngai leh an iaina tur avang hle a, tunlai hunah pawh hei aia \ha tur chuang hi avang hle awm e.

Kaphleia (1910-1940)

Rev Zairema hian Mizo literature ah hnuhma a nei lian hle. A ni hian essay tam tak a ziak a, kum 1940-1950 inkar khan “Ka pa, ka ei zo vek mai dawn e” tih te, “Neuh Neuh”, “Thukhuh” tih te leh thu dang a ziak nual a. Mizo zinga lehkhathiam hmasa a ni bawka a thuziak hian belhchian a dawl hle. Thukhuh essay ah hian mizo te mizia lang chhuak si lo te a zep a, “A no ber mai, no ber mai” tih essay ah phei hian chuan literary beauty nalh tak bawngek an\am hmangin min hlui a ni.

Thanpuii Pa, J.Malsawma hian ‘Harsatna’ (1950), Kan Mizia (1960) te a ziah mai bakah kutchhuak tam tak a nei bawk a. Zikpuii Pa (KC Lalvunga) chuan “|hal Favang” (1950) khan a ziak bawk a, Hei bakah hian ‘Sipai’, Zofaten Kawng kan bo ve’, ‘A ruh no no chhuaka’ ah tih te leh thu tam tak a ziak bawk. C.|huamluaia hian essay tam tak a ziak bawka, ‘Zoram Nipui’ tih phei chu tun thlenga zirlaibua la awm a ni.

 

POETRY (HLAHRIL)

Hlahril (poetry) hi literature peng zinga pawimawh tak pakhat a ni. Hlahril/chhamhla chu sap \awnga poetry kan tih hi a ni ber a. Mizo thu leh hla huangah chuan poetry hi a thu mawi leh nalh, lam nuam leh luang \ha deuh hi kan kawh tir ber niin a lang. Poetry chu ihring rilru chhungril tarlanna, thu mawi tak leh awmze nei taka remkhawm, suangtuahna leh mithlaa hmuhtheih khawpa tarlanna thu remkhawm hi a ni.

Mizo zinga poetry (hlahril/chhamhla) ziarang kan neinaa bul\antu chu Hrawva hi a ni. Hrawva hi kum 1891 khan Lunglei chhak Khawthlir khuaah a piang a. A laiah hming chu Rolala a ni a, Khawthir khua a\anga an insawn hnu a, hrawva ram an neih a\angin he hming hi a pu ta a, Khiangte hnam an ni. Naupangte a nih laiin a nuin a boralsan a, a nu hming chu Dolaii a ni a. A nu boral hnu rei loteah a pa Than\hula`n a boralsan ve leh a. Nu leh pa tel lova rethei leh nun ruak taka a awmna chuan hlahril \ha tak tak a phuah chhuah tir a. Hrawva hian hla 16 phuahin hla 4 a letling a, mah se hla phuah thiam tak a nih avangin heng a hlate hian belhchian a dawl em em a, tun thlenga hla lar tam tak a awm a ni. Rimawi ngaina tak a ni a, ‘zai ri tluka ngaihnawm tih a nei love’ an ti hial a ni. A hla phhuah tam ber hi Culcutta lehkha zira a awmlai kum 1920-1924 inkara a phuah te a ni hlawm.

Mizo hlahril hmasa, Hrawva phuah zinga ropui bera sawi chu “Rairahtea Hla” hla, chang 59 zeta thui hi a ni. He hla hi Mizo hla hlui pian hmang, chang khata tlar thum awma phuah a ni a. Hlahril \hen hrang hrang zinga pakhat, thawnthu hla (ballad) huanga mi a ni. He hlaah hian amah Hrawva naupan lai nun retheih thlak tak chu tarlan a ni a. He hlaah hian a pian chhuah a\anga a nu leh pa boral te, a pa-mi te hnena a khawsak dan leh chuta apami nupuiin a tih retheih dan te, a u a thlakhlehna leh a bula a awm tak dan te, zirna bul a\an dan thlengin a tarlang a ni. Rairahtea hla bakah hian hlahril chi hrang hrang- Khuanu Leng Chawi, Awmkawmna Inhlui, Pianna thu lam ka chhui lo tih te hi hlahril a phuah lar zual te an ni.

Poetry huanga mi pawimawh tak pakhat chu L.Biakliana hi a ni bawk. A ni hian a lehkha zira hmun Culcutta-a a awmlai hian thawnthu leh hlahril eng emaw zat a phuah a, hengte hi Zofate tana kawng sat kawtu pawimawh tak a ni. Hla a phuah leh lehlinte hi 25 vel bawr a ni a, chungte chu belhchian tham tak tak a ni hlawm. |hangthar zinga thu leh hla thiam H.Lalrinfela (Mafaa) chuan L.Biakliana hi Fathar of Mizo Poetry nihna a pe hial leh bawk a. Mafaa hian L.Biakliana hian \hangtharte tan hlahril kalphung leh peng thar a chhawp chhuak a, a hla phuah kalpui danah hian a sul su tu pawimawh tak niin a sawi. A hla phuah hrang hrang

Zikpuii Pa, KC Lalvunga hi hlahril phuah kawnga mi hmasa a ni bawk. Kum 1949-a hlahril a phuah; Sakhmel hmuh loh hrai hlimthla, Zozam par tih te, kum 1950-a a phuah Tawnloh chhimtlang, Hruaitu Vanapa, Zaleng hun hmangtute tih te hi hlahril piang hmasa zinga mi a ni awm e. Zikpuii Pa kutchhuak hrang hrangte hian belhchian a dawlin a hla thu hman dan leh remkhawm dan te, a thu phuah chhuah te hian mizo hlahril a ti hausa in tunlai hunah pawh la iai awmloh tak tak a ni hlawm.