Lali Thawnthua Hmeichhe Dinhmun

Lali thawnthu hi kum 1937-a ziah a ni a, a ziaktu chu L. Biakliana a ni. He thawnthu hi kum 1937-a hmeichhe dinhmun tarlang thei thawnthu inziaksiaka lawman pakhatna dawngtu a ni nghe nghe.  He thawnthuah hian Lali chu a changtu pawimawh ber a ni a, amah leh an chhungkuaa thil thleng, harsatna leh buaina kara Pathian a belh tlat dan te, hmangaihtu a char dan leh a tawpa thihna hmanga an chhungkaw nun siam that a nih dan te kan hmu. He thawnthua a changtu pawimawhte chu- Lali, Lali Nu leh Pa, Biakmawia, Lali U Taia leh a nau Zuala te, Lali thianu Thani te chu a langsarte an ni.

MIZO NUNHLUIA HMEICHHIATE DINHMUN

Hmanlai, a bikin Kristian sakhua a lo luh hmaa pawhin Mizo khawtlang nunah hmeichhe dinhmun a hniam hle a ni. Chhungkuaah mawhphurhna tam tak an nei a, an mawhphurhna an hlen loh chuan hmeichhe fel lo an ni leh daih thung. Nula an nih lai atangin in lam leh ram lamah an theih tawkin hna an thawk a, zan lamah anmahni rimtu tlangvalte kawm a ngai leh a, nupui pasal zawn kawngah thuneihna an nei tlem hle. Heng hi he thawnthuah pawh hian kan hmu a ni. 

 1. Hmeichhaite leh inlam hna 

Mizo khawtlang nunah inchhung chet tam tak hi hmeichhe tih turah kan dah tlangpui. He thawnthuah pawh hian Lali leh a nu hi inchhung chetah an buai hle a ni. A thawnthu bultan rualin Lali, Thani leh Lali Nu chu puan tahin an buai nghal a, tui chawi leh eirawngbawl chenin an hna a ni a, Lali phei chu zanah pawh a awl meuh lo. Chaw eina seng, buh den leh tui chawi thlengin hmeichhia vekin an ti a ni. Hmanlai chuan tuikhurah mipain tui an chawi ngai lo. Ram lam leh hna hlauhawm/hautak deuhah mipa an thawkchhuak ber a, a bak chu hmeichhe hna a ni deuh ber. 

 II. Hmeichhiate LEH PASAL ZAWN/NEIH

Mipa in nupui a zawng a, a duh chu palai a tir mai thin. Kawng thenkhatah chuan hmeichhe mitmei (phalna) a lak ve te pawh a awm thin. Mahse thu tawp siamtu chu hmeichhe nu leh pa an ni ber a, chuvangin nulaten pasal zawn/neih kawngah thu an nei ve lem lo. Nupui zawn kawngah pawh mipa pawhin an uluk viau a, thlahtu te atanga inchhui viau ching te, an hna thawh theih dan kawng te, chhungkaw dinhmun te pawh an en ve fo. Lali thawnthuah pawh Lali chunga harsatna lo thleng leh Lali-te chhungkaw chunga buaina lo thlen chhan ber chu Rozika’n palai a lo tirh atang khan a ni. Lali chuan duh lo viau mah se a pa khan a duh tlat a, a pa chu chhungkaw hotu ber a nih miau avangin a thu chu an hnial ngam lo a ni ber.

III. Hmeichhiate leh kutthlak 

Tunlai hun thleng hian hmeichhe chunga kutthlakna hi a tam hle a; pa tam takin an nupuite kut an thlakin an sawisa fo thin. He thawnthuah pawh hian Lali Nu chungah he harsatna hi a thleng a, a thawnthu atanga kan hmuhin a pasal zurui kutthlak hi a tuar zing viau niin a lang. A puantah laia chaw ei siam sak tura a tih khan Lali nu kha a thiltih kha a laklawh viau a, mahse, Lali pa zurui khan thingfakin a vaw nawk nawk tih kan hmu a. Tin, Lali Pa in Zuala a vuak tum khan Lali nu chuan a lo chhan deuh a, chumi avang chuan a vaw chhuak leh a, an inah a haw leh hial tih kan hmu. Heng hian hmeichhiate dinhmun hniamzia a tilang a, pasal an neih fuh loh phei chuan an chan a chhe viau tih kan hmu a ni.