RL Kamlala Hla, “Zawlvanbuk” Thlirna

Mizo hla phuahtute dinhmun hrang hrang atanga lo chawrchhuak an ni a. A \hen lal an nih laiin, a \hen mi harsa chhumchhia tak tak a\anga rawn chawr chhuak an ni thung. Zirna lama sang tak tak an awm laiin, ziak leh chhiar thiam \awk \awk te an ni nawk bawk. Mizo kristian hla thar rawn parchhuahna atan mi pawimawh tak leh hlahril ziarang hmanga hla phuahtu hmasa RL Kamlala hi Mizo hnam leh zai a awm chhung chuan a hming a dai tawh awm lo ve.

I. RL Kamlala Chanchin tawi

            Lutzathanga fapa upa ber R.L Kamlala hi kum 1902 April thla khan Ngurlen-ah a piang a. Zirna lamah pawh a tluang hle a, kum 1919 khan Lower Primary a pass a, Aizawl Sikulpui a\angin Upper Primary a pass leh a, chumi hnuah zirtirtu hna a thawk leh a; zirtirtu hna thawk pah hian pawl riat a zo leh bawk.

            Pathian \ih mi leh thlarau mi tak a ni a. A hla tam zawk hi Pathian fakna hla a ni hlawm. Ralte \awng pawhin hla a phuah nual a, kristian hla tam tak hi Ralte \awnga a phuah hmasak, Mizo \awnga lehlin lehte a ni hlawk bawk. Tin, Sap\awngin Jeremia |ah hla leh Solomona hla te a letling bawk a ni. RL Kamlala hla phuah hmasa ber nia sawi chu “Rinin thlir thiam ila” tih hla a ni. Hla phuah thiam vet ho, CZ Huala chuan hetiang hian a sawi,

Kristian hla thar phuah reng reng hi, ka hriat dan a dik chuan kum 1922 vela kan chin \an hi a ni a. […] Patea’n “Ka ropui leh ka himna hmun” tih a han phuah a. Miin an duh em em a, chuvangin “Lei lal puan ropui chu a tlawm ang” tih hla ka siam ve ta a. Tah chuan Kamlala’n “Rinin thlir thiam ila” tih hi a rawn phuah ta a. (quoted in Zalenna Ram, 77)

RL Kamlala

RL Kamlala hi mi thil chik mi leh invawng fel tak a ni a. A hlate pawh hi uluk takin a vawng \ha vek a. Chumai baka Mizo \awng hmang thiam leh pi pute hla hlui ziarang kan tih mai, hla thu un tak tak hmanga kristian sakhaw lo luh hnua hla phuahtu hmasa pawl a ni bawk.

Kristianna in kan rama zung a kaih hnu khan kan Zosap ten hla kan duhzia hriain hla phuah leh lehlin kawngah hma an la nghal a. An hla kal zulzuiin hla un leh thluk ulh tak tak hmangin hla an phuah a, an letling bawk a. Chung hlate chuan kristian hmasa te chu chiah viau mah se an lunglenna leh an chhungril nun a khawrh phak lo \hin. Chutiang dinhmuna kan din lai chuan Patea te, CZ Huala te leh RL Kamlala te an rawn lang ta a. Mizo hla thu leh thluk zaihin hla an rawn phuah ta a, chu chuan kar lovah Zoram pum a deng chhuak nghal a, tun thlenga Zoram kristiante hlimna hmahruaitu pawimawh a la ni ta reng a ni.

II. Zawlvanbuk

            ‘Zawlvanbuk’ tih hla hi R.L Kamlala hlahril zinga pakhat a ni a. Vanglai hun hlutna leh hlimawmzia tarlanna hla a ni. He hlaah hian hla chang nga a awm a, chang  khatah tlar li zel a awm bawk a; a vain tlar sawmhnih a ni. He hlaah hian chang tina tlar hmasa ber leh tlar thumna zel hi thu lam (syllables) sawm leh pakhat (11) a ni a, a tlar hnihna leh tlar lina te hi lam kua (9) a ni bawk.

 R.L Kamlala hla hi chi hnihin amah ngeiin a \hen a; Kristian hla leh Mihrinna hla tiin a vuah a. Mihrinna hla a tihte hi chu Kristian hla ni lo, mihring rilru leh ngaihtuahna zalen taka a puanchhuahna lam hla a ni hlawm a, amah ngeiin heng hla te hi ‘Ka hla chuam’ (79) tiin a sawi \hin nge nge. He hla ‘Zawlvanbuk’ tih pawh hi R.L Kamlala hla chuam zinga mi a ni awm e.

He hlaah hian tlai ni tla tur pawh hmuh theih loha ruah leh chhumin van a rawn tuam pup pup mai chu min hmuh tir hmasa ber a. Chu khaw awmdan chuan tlangval nula rim tur pawh chhuak hlei thei lova siamin Zawlvanbuk hmunah chuan a tawmkhawm tir a. Chu hmunah ngei chuan hlim taka zaiin an vanglai nun an chen a ni tih a rawn tarlang hmasa ber a. Chu hmun atang chuan vanram pawh ngaihtuah phal chi ah a dah lo hial niin a lang,

In zawn van pialral a hla e lo kir rawh

He khawvel hi damlai pialral chu; (5-6)

ti hialin he hla changah hian a uar a. Sawmna siam nghalin, “Haw rawh tinkim sei i dawn loving”(8) tiin a sawi zui leh bawk.

He hla chang thumnaah hian mihring nun leh Zoram nawmna te, vanglai nun nawmna te a rawn puang chhuak leh a,

            Hnam tin an kal, zaleng an liam famkhuaah,

            Lam ang let zai reng an rel lo ve;

tiin thihna hi keini Mizo te chauhin kan tawng lo va, hnam tinreng hi thihna hmachhawn lo kan awm lo a ni tih a rawn sawi hnuah,

            Kan lenna ram hi a lo nuam thlir ve rawh,

            Hei ang lawmna dang i tawng lo vang.

tiin Zoram nawmna leh a chhunga kan hlimna chu khawi hmun dangah mah awm ve lo hialin a sawi a ni.

R.L Kamlala hian kristiante thurin Bible-a “|halaite u, in vanglai chen ula, inla naupan viau lai hian hlim rawh u” (Mizo Bible, Thuhriltu 12:1) tih thu changchawi ang hialin vanglai nun hlim taka hmang turin min chah tel bawk a. He hla chang lina ah hian,

            Par ang vul lai chhin a awm lo khawvelah,

            Sai i sen lai zawng i ngai lo vang;

                        Aw, i lawmna tunah zawng rawh, zawng mai rawh.

                        Hai ang tar lai ni i hmachhuan e.

            Khawvel kan damchhunga hun hlimawm ber chu kan \hatlai hun leh nun a nihzia chiang takin min hrilh a. Naupan lai hun ngai miah lova vanglai hun chen turin min fuih lawm lawm a, “Aw, i lawmna tunah zawng rawh,” tih mai pawh duhtawk lovin “zawng mai rawh” tiin min la fuih \ang \ang te, kan hma lama upatna leh tar nihna kan hmabak a nih ziate chiang takin min hrilh bawk a. Hei hian vanglai nun hlutzia leh ropuizia chiang takin a tarlang tel bawk.

            A tawp berah chuan he hla phuahtu hian fuihna leh sawmna hmangin a hla tawp a rawn khar a. Khawdur leh ruahpui te a reh a, zing ni chhuak engmawi a rawn lan leh meuh chuan an intihhlimna te chu kalsan in, \halai rualte chu,

                        Ai ang tho r’u lanu leng leh val zawng zawng,

                        Ram in \uan nan kawl a thiang ta e!

            tiin kan ei leh bar hmuhna hnathawh kawng zawh turin min fuih leh bawk. R.L Kamlala hian he hla chang nga a sei lekah hian hringnun a buk a, a belhchianna leh hmuh a\angin fuihna leh chona a rawn tarlang a ni kan ti thei ang.

III. ‘Zawlvanbuk’ Finthuril (philosophy)

            R.L Kamlala hla tam takte hi a hla thuken finthuril (philosophy) ropui tak tak a ni hlawm a. A hlate zirchiangtu F.Lalzuithanga chuan, “A hla thuken leh thukphum (philosophy) lah ril tak tak leh sawifiah chhuah thiam harsa zawk khawpa chai fe ngaite a ni a.” (Laisuih, 97) tiin a sawi a. He hla, ‘Zawlvanbuk’ tih pawh hi sawichhuah thiam loh a hlauhawm hle. Kan hmuh leh hriat theih ang ang; ngaihruatna nen he hlaa thuril inphum hi lo belchiang dawn teh ang.

            He hla thupui, ‘Zawlvanbuk’ hi eng a sawina nge ni ang? tih hi chai fe tham a ni awm e. A hla phuah hun leh nun a\ang te, a hla tam tak te a\anga thlir hian he ‘zawlvanbuk’ hi Pathian biak in emaw kohhran \halai inpawlkhawmna lam thil te pawh hmehbel theih a ni awm e.

            Harsatna leh buaina chi hrang hrang lo thleng \hin karah pawh kohhran bel a, Pathiana innghat tlat \halaite chuan nun hlimna thuruk an nei \hin. Khawvel lama tlan a, vanram kai duh ve tho si te pawh sawm telin Pathian fak leh chawimawi a, Amah chibai buk tlukna hlimna dang a awm lohzia tarlan nan he hla hmang hian \halaite a fuih kan ti thei bawk ang.

            Chutih rualin kan pi pute nuna hmun pawimawh tak, Zawlbuk sawina pawh a nih theih lohna a awm chuang lo! Tlangval rual, nula rim thei lo va, khawchhiain a dan takte hlim zai thawm chuan vanglai nun nawmzia leh hlutzia a hriatchhuah tir a, chuta \ang chuan \halaite fuihna hla a phuah ta ti pawh ni ila kan sawi sual chuang awm lo ve. Tin, Zoram dung leh vanga \halaite chu hmasawnna lamtluang zawh turin ramdang hmundanga buai lovin, kan ramchhungah ngei hian mawhphurhna leh tihtheih kan ngahzia te a tarlanna a ni tel thei bawk ang. He kan ram nuam tak a\ang hian hlim leh lungrual takin kan theihtawk \heuh tiin lungrual takin kan khawsa thei a. Thawhhreh leh thawh duh loh nei lo vin taima tak leh rinawm taka hna thawk tura \halai rualte a fuihna hla a ni thei bawk ang.

            He hlaah hian thil chi hrang hrang a inphumru a, hriatfiah leh sawifiah thiam a har hle ang. Khing kan sawi tak te a\ang ringawt pawh hian he hla phuahtu, R.L Kamlala ropuizia leh a thiamna chung chuanzia chiang takin kan hmu thei bawk ang. He hla hian kawng tinrengin \halaite fuihna thu a keng tih erawh chiang takin kan hmu thei ang. Amah Siamkima’n, “Mizo hla siamtute hi arsi ahte khian chang ta se la, Kamlala hi a eng ber pawl a ni ngei ang” (Zalenna Ram, 85) a tih ang hian R.L Kamlala hla hian Mizo kristian nun mai bakah kan khawtlang nunphung thlengin thuril leh finna thuk tak a pai kan tithei ang.

IV. Hlarua

            Hla mawina hi hla thu chheh thiamna te, hman thiam dan leh hman dik hian hmun pawimawh tak a luah a. R.L Kamlala hi Mizo hla phuah thiam zinga hlarua hmang thiam tak zinga mi chu a ni ngei ang.

            He hlaah hian Mizo hla thu mawi tak tak kan hmu nual a, a hla chang hmasa ber hi lo belchiang ila,

                        Kawl a lo hnim van rang chum a lo zing riai,

                        A lang lo ve, turni siang lawina;

                        Val zawng len kham khuangruah a lo chhiar nghian a;

                        Zawlvanbuka’n zai tin an sa e.

tiin. He hla changah hian Mizo hla thu mawi hman loh reng a nei lo. Vana chum inzial mum let tup tup leh zing mup sawi nana ‘kawl lo hnim’ leh ‘zing riai’ tih a han hmang te; khawthlang kila tla \hin ni sawi nana ‘turni siang lawina’ a han tite hi Zopa mit leh beng, hriatna zawng zawng fan hneh khawpa chiangin a rawn chhawp chhuak thiam a ni. Ruah tla sawi nana ‘khuangruah chhiar nghian’ tih a han hmang te hian ruahsur min tem tir a, \hal lai pawhin ruahsur hnuaiah min chentir thei hial a ni. Hei hi Kamlala ropuina chu a ni.

            Pi pute nuna hmun pawimawh ‘pialral’ a rawn hmanna te hian he hla hlutna hia a tichiang a, Mizo te thin lungah a fiah kuar mai ni. Thi leh thau pawlha sa leh ral hmaa thlantui nena thihnu piahlam nun an tinzawn chu pialral hmun a ni. Chutah chuan faisa ringin, hnathawk lo in nuam takin an khawsa dawn niin an ngai \hin. Chu pialral hmun ngei mai chu rawn pawthnaiin, “He khawvel hi damlai pialral chu;” tiin hlim taka vanglai nun chena hlima chu damlaia pialral tawng angin a rawn tehkhin thiam te hian he hla hi a ti hlu hle. Hei hi poetic technique chikhat allusion kan tih zinga mi a ni bawk.

            Thil pahnih in anna lai sawikawpna leh khaihkhinna (simile) a hman thiamzia he hlaah hian chiang takin kan hmu bawk. Mithi te chu an lo let leh tawh ngai lo a nih tih tehkhin nan ‘lam ang let zai reng an rel lo ve’ tih a han hmang te, Vanglai nun sawi nan ‘par ang vul’ tiin pangpar vullai nen a han tehkhin thiam te hian a tinalh hle. Mihring hun chawhnu lam chu ‘hai ang tar’ tiin a hmang bawk.

            Tin, hmehbel tehkhinna (metaphor) pawh kan hmu bawk. Ni tlakna hmun chu mihring ten kan ina kan haw \hin nen tehkhinin ‘turni siang lawina’ tiin a sawi a. Vanram sawi na ‘van pialral’ tih a rawn hmang bawk a. Mitthi khaw sawi nan ‘fam khua’ tih te, ‘kawlrawn; tih te leh ‘lanu leng’ tih te a hmang bawk.

V. Tlipna

            Mizo hla phuahtu tam tak, an hla hmanga kohhran hlimna thlentu te zingah hian hlahril ziarang tak tak nena inkungkaih hla nei hi an vang hle a. Kristian hla thluk nei mai baka hlahril nen lama phuahtu kan neih langsar tak zingah R.L Kamlala hi sawi hmaih theih a ni lo vang. A hla phuah, a ‘mihrinna hla’ te pawh hi zir tham leh chai tham, hringnun phawk chhuak hla thuk leh ril tak tak, mawi leh nal taka remkhawm te an ni hlawm. Chuvangin R.L Kamlala leh a kutchhuakte hi Mizo thu leh hla huangah hian hmun pawimawh an la luah reng a rinawm hle.

 

 

Works Cited

Khiangte, Laltluangliana. Dr. Mizo Hla leh Chham Hlate. Aizawl: LTL publication, 2009. Print

Lalzuithanga, F. Laisuih Bu Hnihna (Essay on Criticism), Aizawl: Lengchhawn Press, Aizawl. 2016. Print

Laldinmawia, H., Literature Lamtluang, Creativenture, C-22, Karan Gharonda, Pune, 4111014, Maharastra, 2015. Print

Lalthansanga, KC. Beiseina Khawvel. Aizawl; TS Khupchong, Aizawl, 2015. Print

Thanmawia, R.L, Chuailo Bu-1 na, Din Din Heaven, Ramhlun South, Aizawl, Second Edition, 2011. Print

Siamkima. Zalenna Ram. Aizawl: MC Lalrinthanga, Khatla Aizawl. Third Edition, 2012. Print