Mihring suangtuahna leh thil tawn te hian thu leh hla \ha tak tak min pe a. Kan ziah chhuah dan hian a ngaihnawm leh hlutna erawh a hril thui hle. Rauthlaleng thawnthu tawi R.Zuala ziakah hian a changtupa Hrangkhuma mumang leh a ramvahnaa a thil tawn inzawm chho chanchin leh kan thawnthu hlui nena inhnerem taka kal dun, thawnthu ngaihnawm tak a ni.
Rauthlaleng ziaktu R.Zuala hi a hming tak chu Rallianzuala a ni a, German ral len lai behchhana a hming hi phuah niin an sawi. A pa hi Mizo zinga lemchan lama kuthnu nei hmasa leh bul\antu zinga mi Ch.Pasena a ni a. He thawnthu hi kum 1984 kuma a ziah a ni a, hemi kum hian cancer a vei tih hmuchhuah a ni bawk a, a hnu kum 1990 November ni 5-khan chatuan ram a pan ta a ni. A mah hi lehkhathiam leh thu leh hla lama tui a nih avangin a boral hma pawhin a kutchhuak tam tak a tichhuak tawh a, lehlin lamah pawh kuthnu a ngah hle a ni.
A thawnthu tlangpuiah
chuan - Hualtu tlangval Hrangkhuma chu a changtu ber a ni a. A mumangah |awi
tlang ramah lo ramchhuakin, chutah chuan kawng a bo va. Tlang kar chengker biru
taka dilah a chhuak hlawl a. Chu dilah chuan a thlan te tidaiin a insil vel a,
hmeichhe pakhat hian rawn kovin chu tuikhura a insil mai avang chuan an khuaa
zin turin a intiam tir a, ani pawh chuan a lo aw ve mai bawk a. Kawng bo a nih
avangin haw kawng te a hrilh a, chuta a haw kawngah chuan a mumang a\ang chuan
a harh ta a.
Tichuan, a \hiante pahnih,
Hlira leh Zika te nen an ramchhuak a. Chutah chuan an sa kah chhuina lamah a ni
chu an haw san ta a. Amaha a chhui zel hnuah a chesual a, a thidang ta a.
Chutia nikhaw hre loa a awm hnua a harh leh chuan a mumangah a hmuh hmeichhia chuan rawn
bawisawm a. A mumanga a lo intiam tawh avangin an khua Thuahriathnuaiah chuan
zin turin a zui ta a. Chutah chuan Mizo thawnthua Chhura leh Naa te,
Chemtatrawta te chu a han kawm a, ngaihnawm takin he Thuahriathnuaia a thil
tawn hi a tarlang a. Chumi hnu chuan a lo harh a, an khaw mi ten an lo zawng
nasa hle tawh a lo ni a. A thil tawn chu a ngaihtuah a, mak ti takin a mu a ni.
He thawnthu hi Short story
(thawnthu tawi) kan tih ang chi, fantasy (suangtuahna) huanga mi a ni bawk. A
thawnthu a tawi a, mahse thil thleng pakhat behchhana ziak a ni a. Prof.
Brander Matthew chuan,
Short story-in a tum ber chu a tawi thei ang
bera tu chanchin emaw, tu chunga thil thleng emaw uar taka tar lan hi a ni a;
mi chekngel takin ren taka pawisa a hmang a, thil \ul lem lo lei nana pawisa a
hmang ngai lo ang hian short story pawh renchem taka thawnthu ziak hi a ni. [quoted
in
tiin a sawi a. Hetiang ang chiah hian he
thawnthu tawiah pawh hian Hrangkhuma thiltawn thlur khat chu a mumang a\angin
min \an pui a, a ramchhuahna hmuna a thil tawn chanchin chu tawi famkim takin
min hlui sak a. Suangtuahna hmanga he thawnthu a din hian thilmak leh awihawm
chiah loh pawh nise ngaihnawm takin thil thleng tak ang chiahin min hrilh a ni.
He thawnthua kan hmuh
angin a ziaktu hian kum 1950 hnu lam, rambuai 1966 thlen hma si kum 1960 bawr
vela thil thleng angin a tarlang a. Kristianna in kan ram a tuam chhuak tawh a,
khaw tin leh veng tinah mithiam an kat nuk tawh a, an khawthlir a zau tawh
ngeiin a rinawm bawk a. Heng hunlai erawh hian chuan ramvah leh sapel vel tlangval
leh pa ho thlenga an hun hman tamna ber niin a ngaih theih ang.
Chutiang huna an chen laia
Khuma’n hetiang mumang mak danglam tak mai piah a, a tak ngeia a han tawn dan
chanchin hian a hmalama pi pute nunin kan thinlung a luah zia tarlanna pawimawh
tak a ni thei bawk a. Kan thawnthua kan hmuh mi ropui leh mi mak tak tak te a
hmu mai ni lovin an khuaah hian a han chenchilh a, chumai ni lovin an han
inkawm ho te hi thil thleng thei lo han tihngawt theih loh khawpin he thawnthu
ziaktu hian a ziak ngaihnawm thiam a ni. He R.Zuala rauthlaleng velin a din
thawnthu hian kan pi pute a\anga kan thawnthu inhlanchhawn (folktales) a a
changtute chu he thawnthuah hian rawn kaih telin, an thawnthu kan lo hriat dan
chu anni tan thil thleng tak mah nise kan hriat dan lo danglam tak zia angin
min rawn hrilh a. Chhura leh Nahaia thawnthua Nahaia finna leh phakarna pawh
chu Mizopa tlawmngaihna leh thukhuh ang lekin he thawnthu hian min hrutpui hi
thil awm ang tak a ni bawk.
“Short story in a tum ber
chu chhiartute chawhhlim leh tihhlim a ni. Chuvang chuan short story chu a
ngaihnawm a \ul hle a ni”
Chhura chuan Mawngping khuaa
a zin chuan bung zar a\angin a e thla zuah zuah mai a. Chu chu khuaa miten an
hmuh chuan mak an ti em em a, a chhan an han zawh chuan “Kan naupan laiin kan
nu leh pa te’n kan mawng hi tulthir hmangin min verh sak \hin a” tiin a ek
theih chhan chu a han sawi a. Chu thu an hriat chuan Mawngping khaw mi ho chuan
an fate chu Chhura hnenah lo hruaiin an mawng chu a lo verh sak a, a tawpah
chuan an thih phah ta vek niin kan thawnthuah chuan kan hmu a.
He thawnthu tawiah hian
Chhura’n Mawngping khua a tlawh dan leh an khaw naupang ho chu khawihlipui vei
an nih avanga an mawnga khawihli chu a sawr sak mai a nih thu a sawi te hi kan
hriat \hin thawnthu ai chuan takna (reality) a keng zawk mah a, hei hian
chhiartute ngaihtuahna min la peng nasa em em a ni.
Chutih rual chuan he
thawnthua Chhura te, Nahaia te, Tlingi leh Ngama te, Chemtatrawta te leh midang
thawnthu behchhana a kal hian kawng lehlamah chuan kan inhlanchhawn thawnthu
(folktales) hlutna a tihniam em? tih hi thil chhuizui tlak tak a ni thei bawk.
Folktales hi hnam tinin kan neih leh kan inhlanchhawn zel a ni a, thawnthu a
nih angin nun hlimna leh khawsak phung mila an suangtuahna hmanga an din a ni
a. Chung thawnthu kan ngaihhlut leh kan lo tuipui viau te chu he thawnthu tawi
hian thlirna dang a rawn piantir a, a hlutna kha a rawn tidal thei tlat a ni.
Chhura thawnthu kan lo nuihpui viau te kha he thawnthu a\ang erawh chuan thu
tak leh ngaihhai palh avanga thleng mai niin a lo lan tir tlat a ni.
Thawnthua thil pawimawh
tak chu chhiartute hmuhfiah theih tura sawifiah thiam hi a ni. Thawnthu hi
lemchan thawnthu te nen an in ang thei lova, a hmun hma din leh hman te pawh a
nih dan sawifiah thiam a ngai \hin. Chhiartute tan thawnthua kan chen tak tak
theih nan an chetna hmun leh thil thleng, awmdan leh nunphung te chiang taka
sawifiah thiam a ngai \hin.
He thawnthuah hian Khuma
ramchhuahna hmun leh an khaw bul vel ram awmdan chu chiang leh fiah takin min
hrilh hmasa a. |awi tlang chu he thawnthu hmun innghahna pawimawh tak a ni a.
“Tin, |awiah hian sa a tam a,… Mizoram tlangah chuan a lian ber a ni a, a
chhehvelah hian khaw lian tham fe fe pariat kan bet a ni.(Rauthlaleng 3)” tiin
a tlang pianhmang thlengin min hrilh hmasa a, chu hmuna ‘dil biru tak’ chanchin
pawh min hrilh hmasa bawk. Heng hmun pianhmang leh nihdan chiang taka a tarlan
hian chhiartute a thawnthuah min chen tir a, ramchhuak mi ang maiin ramngaw
hnuaiah min vahpui ve thei hial a ni.
Thawnthu tawiah chuan
novel te angin a changtute chanchin pawh kimchang taka tarlan duah a remchang
ve lova. Thawnthu tawi a nih angin funkim taka hraitfiah thei tura tarlan thiam
a ngai \hin. He thawnthuah pawh hian a changtu ber Khuma hian a tirah ama
chanchin tawi a lo tarlan bak a chanchin dang tarlan vak a ni lo. Hetah hian he
thawnthuin a mamawh tawk chu chiang takin kan hmu thei nghal a, hei hi a
thawnthu \hatna tak pawh a ni awm e. A thawnthu bul\anna a\angin mahni chanchin
sawina (direct narration in first person) angin a hming leh an khua te,
ramchhuaha sapel chu nuam a tih zia te an rawn sawi a, chubak a chanchin dang a
lang lem lo.
Hnam tin hian kan thu leh
hlaah hian kan hnam darthlalang kan bel \heuh a. Kan zia leh ngaihdan te, kan
ngaisan leh suantgtuahna thlengin kan literature-ah hian kan phum ru \hin.
Rauthlaleng thawnthu tawiah hian kan pi pute suangtuahnaa hmun pawimawh tak
mitthi khua (Thuahriathnuai) chu kan hmu a. Tlingi leh Ngama thawnthuah chuan
Tlingi thih hnua Ngama lunglêng chu a mumangah mitthi khuaah a han kal a, an khawsakphung
leh thil neihte pawh a danglam vek niin kan hmu a, “…mitthi khua chu minung
khua aiin a hnuai zawk a, a dinhmun (status) a hniam zawk kan ti thei bawk
ang.”
He thawnthua
Thuahriathnuai khua mi te hi Hringkhua mite ai chuan an khawsak phung pawh a
hniam niin a lang a. An naupangte pawhin thawmhnaw mumal an ha lova, zu pawh an
la hmang uar hle tih kan hmu a. Thawmhnaw mumal pawh patling pawhin an inbel
meuh lo tih kan hmu a, kan pi pute thawmhnaw hmasa siapsuap leh hrenpereng mai
chu an thawmhnaw inbel awmchhunte chu a ni hlawm. Hei hian kan hnam hlui
khawsak phung mai bakah kan pi pute thihnu piahlam suangtuahna pawh a rawn
tarlang tel bawk.
Tin, a changtupa Khuma’n a
awmdan leh a awmna hmun te chu mak a tih avanga ngaihtuahna vakvelin Lunglohtui
a han ngaihtuah thleng te, Hringlang tlang te hian kan pi pute nunah awmze thuk
tak a nei bawk.
A thawnthu nena inmil tak
R.Zuala “Rautlaleng” hi chhiar a nuamin, a ngaihnawm a. Nun a tihlim mai bakah
ngaihtuahna a hruai thui hle a, thawnthu tawi kan neih zingah suangtuahna
hmanga din hnam zia keng tel thawnthu ngaihnawm pawl tak chu a ni ngei ang.
Works Cited
1.
Laldinmawia, H. Literature
Lamtluang.
2.
Lallianzuala. Mizo Thawnthu Zirzauna. Ed. Lal
Rinawma.
3.
Vannghaka, Dr. KC. Literature Kawngpui.
Bibliography
1. Hauhnar,
Mafaa. (Edt.) Khawithlar (R.Zuala Thu leh Hla Lawrkhawm). Aizawl: Mamawii
Colney, 2nd Edition, 2012. Print
2.
Laldinmawia, H. Literature Lamtluang. Aizawl:
CreatiVenture, C-22 Karan Gharondha, Pune 411404, 2015. Print
3.
Lallianzuala. Mizo Thawnthu
Zirzauna. Ed. Lal Rinawma. Aizawl: Hrangbana College,
2014. Print
4.
Vannghaka, Dr. KC.
Literature Kawngpui. Aizawl: Vanhluipuii, Bungkawn Aizawl, 2010. Print
5. Thanmawia, RL.
Mizo Hnahthlak Thawnthu Vol -1. Din Din Heaven Publication. First
Edition.2008.Print.
No comments:
Post a Comment