Lemchan thawnthu mai ni lo, thu leh hla lama mi ropui William Shakespeare-a hian lemchan thawnthu 37 lai a ziak a. Heng a lemchan thawnthu ziah te hi an hunlai mai ni lo, tun hun thleng pawha khawvel lemchan thawnthu \ha zinga chhiar hmaih theih hauh loh te an ni hlawm. Shakespeare-a hian thawnthu hlui behchhanin lemchan thawnthu a ziak nual a, chung zinga hmingthang tak pakhat chu Julius Caesar hi a ni.
I. William Shakespeare
English mi lemchan thawnthu leh hla phuah thiam
William Shakespeare hi kum 1564 April ni 26 khan Stratford-upon-Avon-ah apiang a.
John Shakespeare leh Mary Shakespeare te fa a ni a, kum 18 a nihin Anne
Hathaway nen inneiin fa pathum an nei a. Kum 1585 a\angin lemchan lamah a
inhmang chho a, lemchangtu leh thawnthu ziaktu nih a kawp a, a hnuah ama pualin
lemchangtu pawl King’s Men a din nghe nghe a ni. A kutchhuak tam ber te hi kum
1958 leh 1613 inkara mi te an ni hlawm a, a bul\anna ber pawh comedy leh
historical play lam a ni ber. Kum 1616 April ni 23 khan kum 52 mi niin a boral
ta a ni.
A kutchhuak te hi a boral hnuah a \hian John
Heminges leh Henry Condell te chuan kum 1623 khan ‘First Folio’ tiin an ti
chhuak a. Mi dang ang lo takin Shakespeare-a hi an hun hmalama lemchan thawnthu
ziaktu dangte ngaihpawimawh, lemchan thawnthu ziak dan ruangam Greek mi Aristotle-a
lo zam tawh kal pel hmasatu leh romanticism bul \antu ang hiala ngaih theih a
ni a.
II. Julius Caesar
Kum BC 44 hunlaia Rom lal ropui Julius
Caesar-a chanchin behchan lemchan thawnthu William Shakespeare a ziah hi kum 1599 vela a ziak niin a lang a. He
lemchan mipui en atana an chhuah \uma en ve Swiss khualzin Thomas Platter the
Younger-a dairy a\anga a lan danin kum
1599, September ni 21 khan Globe Theatre-ah chan a ni a, kum 1623 khan
First Falio-ah mipui chhiar theia chhuah a ni bawk. Shakespeare-a hian he
lemchan thawnthu, Rom history behchana ziah hi Plutarch-a ziak ‘Life of Brutus’ leh ‘Life of Caesar’ tih a\anga a lak a ni bawk. Rome history
atanga lemchan a ziah hi pathum zinga mi a ni a, a dang pahnihte chu Coriolanus
leh Antony and Cleopatra tih te an ni.
Kan thlir tur Julius Caesar lemchan thawnthu
hi Rom lal ropui pakhat tualthihna chanchin, a taka thil thleng ngei behchana
ziak a ni a. He lemchan thawnthu hming kengtu Ceasar-a chu lal ni mai tura a
awm laiin phiarrukna avangin a rorelna dawhkan kilpui ten an that ta a. Chu
thihna chuan buaina thlenin amah thattu te leh mipuite inkarah buaina awm zelin
a tawpah chuan Ceasara thattute pawh chu an boral ve ta vek bawk. He lemchanin
a tarlan tum ber chu zahawmna, ram leh hnam hmangaihna leh in\hian \hatna
chungchang te a ni.
III. Elements of Drama
A\anga Thlirna
He lemchan thawnthu hi chiang zawka kan hriat
theih nan lemchan thawnthu hmanraw pawimawh tak tak a\angin kan bih thuak thuak
dawn a ni.
III.I Plot
Julius Caesar lemchan thawnthu hi Shakespere-a
hian a lemchan thawnthu dang ang bawkin classical unities hnawlin he lemchan
thawnthu pawh hi a rawn duang a. Classical hunlai chuan lemchan reng reng kha
awmze nei leh kalphung nei thlapa chan leh duan a ni a. Greek ho dan hnuaiah
lemchan kha a awm a ni ber. Chung hunah chuan critic
lar John Dryden-a chuan classical kalhmang bansan a hun tawh zia ti hian a sawi
a, “Greek ho chuan chuti chuan an ti emaw, ‘Aristotle-a chuan chuti chuan a ti’
tih ringawt inkhuahkhirhtir reng mai chu a veikhawrthlak deuh va. Mihring finna
leh thiamna lo sang zelah hian tih dan thar kan chher chhuah a \ul a ni” (qtd
in Literature Kawngpui, 202) Hei hi Shakespeare hian a rawn zawm hmasa ber a,
romanticism bul \antu pawimawh tak a ni.
Plot hi lemchanah a pawimawh hle a, lemchan
thawnthu ngaihnawmna hriltu ber a ni. Aristotle-a chuan “Tragedy lemchanah
chuan thawnthu ruangam hi lemchan tinungtu thlarau a ni a” (qtd. In Literature
Lamtluang,159) tiin a sawi a. Hei hi classical tragedy-ah chuan zawm pawh a
hlawh hle reng a ni. Gutav Fregtag-a’n lemchan pianhmang hlawm a \hen - exposition,
complication, climax, denouement leh solution or catastrophe hi a a tlanglawn
ber a ni ta. He Freytag’s pyramid a\anga thlir hian he lemchan thawnthu ruangam
indin dan hi a tha hle.
Thu bul phochhuahna (exposition) ah hian Flavius
kawtthler lo langin hetah hian Ceasar-a ropuina leh a ral do haw lawmin mipui
an lo pung khawm a. Scene II-ah chuan Ceasar a lo lang a, aienthiamin a hmalam
hun atan fimkhur tura a chahna “March ni 15-ah hian fimkhur ang che” (Act 1,
Scene I, 7) a tih kan hmu. Cassius-a leh Brutus-a te inbiakna kan hmu leh a,
Cassius-a chuan Brutus-a rilru hneh tumin \an a khawh a, Ceasar-a thikna chu an
nei ve ve tih a hriat a, Brutus-a erawh chuan, “…ka hmangaih a ni” (9) a ti
bawk si. Cassius-a phunrukna “Aw Brutus, i va han ropui tak em! Amaherawhchu i
pianze ropui tak chu anihna hmun ata \huai herin a la awm ngei dawn si a” (19,
20) tih kan hmu a. Anni hian a hnulam thil thleng tur chu an rawn chawk nung
chho a. Lemchan kalhmang tur leh eng angin nge a kal zel dawn tih kan hre \an
a, a hnu leh chhiar chakna min pe a ni.
Buaina a rawn inmung \an a Brutus-a chuan a \hian
\ha Caesar-a chu ram han kaihruai tura rinna a nghah ngam loh zia kan hmu a.
Caesar-a that turin ruahmanna an siam a, inphiarrukna thil a rawn lang \an a.
Caesar-a chung thil thleng tur chu dan theih loh khawpin inphiarrukna chuan a
rawn chim a. Hei buaina lo in\an chho leh inphiar rukna thil lo lang te hi
complication kan tih kha a ni.
Act III, Scene I-ah March ni 15 ni chuan Capitol
tual a lo lang a, Caesar-a’n ngaih\hat lohna nei mial lovin rorel-na in a lut
a. Chutah chuan thihna chu a tawng ta a. Hei hi a thawnthuin a tawn sang ber
climax a ni. Hemi hnu hian Anthony-a’n Caesar-a vuina huna a thusawi a\angin
buaina chhan a lo lang \an a. Mipui te chu Caesar-a phuba lak tumin an phusa a,
Brutus-a leh a \huihruaite erawh an tlanchhe ta tih kan hmu bawk. Scene III-ah
chuan Brutus kan hmu a, an buaina chuan ralmuang takin a awm tir thei lo tih kan
hmu. A hnuah chuan an buaina chuan a mal malin thihna ruamah a hnuk lut a. A
tawpah chuan Brutus-a ngei pawh chu a chhiahhlawh zinga mi Octavius-a
ngunhnamah a intihlum ve ta. (Act V Scene V) Tichuan, buaina chu chinfel a ni
ta a, solution chu kan hmu ta a ni.
Hetiang a\anga kan thlir hian he lemchan thawnthu
ruangam indin dan hi a fel fai tawk hle a. Thil thlen dan indawt chho leh
thlirtu/chhiartu te tan pawha ngaihnawm leh hmuhnawm tak ni turin a din a ni.
III.II
Character
Lemchanah hian a changtute hi an
pawimawh hle. Lemchan hmuhnawm leh hmuhnawm loh hriltu pawimawh tak an ni. He
lemchanah hian mipui ni lo lemchangtu dang mi sawmthum panga bawr vel kan hmu
a. A pawimawh leh langsar deuhte chu Caesar, Brutus, Cassius te leh roreltu
midang lo lang te hi an ni awm e.
Shakespeare-a hian lemchan
thawnthu-a a changtu aduante hi mi chi hrang hrang, dinhmun in ang lo tak tak
an ni tlangpui a. Lal leh roreltu te, mi chhia leh mi ropui tlengin a hmang dun
\hin. He lemchanah pawh hian pheikhawk siamtu a\anga Aienthiam thlengin kan hmu
a. Heng mite hian an mahni zawn \heuha pawimawhna an nei vek a, a thawnthu laimu
tarlanna atan an \angkai vek a ni.
He lemchan hmingputu Julius Caesar-a hi lal ropui
leh mahni inngaihlu tak, (Act II, Scence II, 44) a ni tih kan hmu a, amah
ngeiin, “Caesar-a chuan thil a tihsual ve loh avangin a chhan \ha tawk a awm
loh chuan a lungawi mai lovang tih hre ta che” tiin Metellus-a hnenah a sawi a.
(Act III, Scenc I, 56) Tin, rilru leh taksa lama bawrhsawm tak (Act I, Scence
II, 10) niin he lemchanah hian kan hmu a. A beng pakhat chu a chhet a ni tih
kan hmu bawk. (15) Act I, Scenc II ah Casca thusawiah chuan, “…a thaw a chham
\helh mai a, a thidang titih a, a \hu ta nghe nghe a” (17)tih kan hmu. Tin,
puithuna thil ring deuh tlat a nih zia Anthony-a hnena a thusawi Calpurnia dek
tura thurawn a pekna te, Capurnia-a’n a nupui mumang a hrilhlawkna a rin bur
mai te hian a ti lang chiang hle. Heng zawng zawng avang hian a rorelna
\hutphah kilpuite ngei pawhin an ring ngam lo a, phiarruka a lalna paih mai
baka thih phah hiala a tuarna chhan a ni.
Dynamic character kan hmuh Brutus-a hi ram vei leh
hruaitu dinhmun chelh thiam tak, mi thinchhia leh mahni zahawmna ngaipawimawh a
nih zia kan hmu a. A nupui hnenah pawh an thil tum sawi duh loh zia te, amah
ngeiin “ Kei aia manganna tuar thiam hi an awm bik lovang” (Act IV, Scene III,
100) tia a sawi a\ang te hian mahni inthunun thei tak a nih zia chiang takin
kan hmu bawk. Heng hian hruaitu dinhmun a tlin zia a tarlang a, a \huihruaite
rin pawh a hlawh phah a ni. Mahse, Cassius-a erawh chuan a rilru panna lai
hriain Ceasar-a thahna tura hnarkaitu berah a thlem thlu thung si.
Anni baka lemchangtu dangte pawh hian he lemchan
thawnthu kal zelna atan pawimawhna an nei \heuh a. An dinhmun \heuh hi he
lemchanah hian a pawimawh vek tih kan hmu thei. Hei hi Shakespeare-a character
din thiam zia tarlangtu chiang tak a ni awm e.
Kan sawi tawh angin Shakespeare-a hian a lemchan
ziahah te hian character a ngaipawimawh zawk zel a. An mizia leh chetphung a
zirin thawnthu ruangam chu a kal mai \hin. He lemchanah pawh hian Brutus-a
rilru chu sawi danglamin Cassius-a chu hmanruaah a hmang a, Caesar-a thihna tur
pawhin Decius-a chu bumchhuah tirin a chhak lohna zawn chu a hmang thiam hle
tih kan hmu thei.
He lemchanah hian Shakespeare-a lemchan dang ang lo
takin thihna kan hmu nasa hle. A lemchan dangah te hian mihring nun hi a hlut
a, Pathian te rorelna chu a tragedy dangah pawh a nghak mai \hin. He lemchanah
erawh hian chuan buaina lo chhuak atangin a tawp thlengin thihna kan hmu a.
Pawisawi lo Portia-i leh hla phuah thiam Cinna thlengin an chungah thihna a
thleng tih kan hmu.
III.
III Dialoque
Inbiakna \awngkam hi lemchana
pawimawh ber zinga mi a ni a. An thil tum leh thil thleng tur an sawina na mai
ni lovin an thufing inphumrukna pawimawh tak a ni tel bawk. Dialoque hian a
changtute mizia min hriattir thei a, an thu kal hmang leh lo thleng tur atan
chiartu leh ngaithlatute tan phurna a siam \hin.
He lemchana an inbiakna \awngkam kan
hmuhte hi a thawnthu mil tawk zelin a ziaktu hian a kal pui a. An dinhmun leh
an nihna milin \awngkam hman tir dan tawk pawh a thiam hle. Caesar-a chu mi
ropui tak a nihna leh a chapona tarlanna atan \awngkam bung leh ngaihnobei lo
tak tak a chhak chhuah tir a. “Min tih\haihtu leh vau zam tumtu chuan ka
hnunglam chauh lo chu a hmu ngai lo vang. Caesar-a hmel an hmuh phawt chuan an
bo leh duak \hin” (Act II, Scenc II, 44) tiin a ma thusawi ngei kan hmu a. Hei
hian a mizia chiang takin min hrilh a ni. Cassiusa mizia Ceasar-a’n a sawi,
“Lehkha a chhiar tam hle a, enthlatu fing tak, mi thiltihte chik zet maia lo
thlir rengtu a ni a” (Act I, Scenc II, 14) tia a sawite hian Cassius-a mizia
tur chu chiang takin min kawhhmuh thei.
Lemchan thawnthu inbiakna \haah
chuan inbiakna \awngkamah thufing tak tak an phu rum \hin. Hei hi Shakespeare-a
thiamna leh a hmingthanna chhan pakhat pawh niin a alang. Act II Scenc II ah
chuan Caesar-a \awngkam, “Mi dawizep chu a hnukchah hmain vawi duai lo a thi
\hin! Pasl\ha erawh chuan \um khat bak thihna a tem ngai lo thung” (45) tih kan
hmu a. Cassius-a’ “Mihringte hi a chang chuan mahni chanvo leh kan hun tawng
tur hriltu ah kan \ang thei fo zu nia!” (Act I, Scence II, 12) te hi mihring
nun darthlalang, thufing leh ngaihtuah ngun tlak khawp ril te a ni a. Heng
bakah hian thu \ha tak tak an inbiakna \awngkamah hian kan hmu a ni.
Phunrukna \awngkam (soliloquy) kan
hmuhte pawh hian he lemchana dialoque hman thiam zia kan hre thei ang. Act I,
Scene II-a Cassius-a’n Brutus-a kal liam hnua a thusawi, “Caesar-a pawh…ka
thingtla thei tho tho ang; ka thinthlak theih loh vek erawh chuan a thak thakin
kan thak tawh mai ang chu” (20) tia a
sawi te hian a hnulam chhiar leh hriat chakna min pe a mai bakah Cassius-a
mizia leh Brutus-a rilru chu a hneh ngei dawn a ni tih kan hre thei. Brutus-a’n
amaha a rilrua a vei leh a nhgaihtuahna a sawi chhuahte hian Caesar-a a
hmangaih zia te, Rom khua leh tui a hmangaihna te leh a ma mizia ngei pawh kan
hre thei a ni. Heng hi he lemchan thawnthua inbiakna \awngkam \hat zia tarlanna
\ha tak a ni.
He lemchanah hian dialoque hian \hat
tawk lona kawng a nei ve bawk a. Lemchana a changtute thusawi sei tak taka han
remkhawmte hian lemchan changtu tan buaina a thlen theih mai bakah a thilrtu
leh chhiartute tan hriatfiah lohna a thlen thei bawk. Tin, tharum thawhna thil
thleng \awngka hmanga sawi mai theih tam takte chu a taka thlen tir awm hi
inbiakna \awngkama han zeh tel theih nise thil \ha zawk a niin a rinawm bawk.
III.
IV Conflict
Conflict chu lemchan thawnthua a
changtute chunga harsatna leh buaina rawn piang chhuak hi tiin a fiah ber mai
awm e. He thawnthuah hian heng buaina chawhchhuahna leh rilru lam insualna tam
tak kan hmu a. Heng conflict rawn awm hian a tingaihnawm mai bakah a thawnthuah
chen tak tak theihna min siam sak \hin.
Ngaihdan inpersan leh mizia inang lo
inkara buaina lo awm \hin tarlan te hian lemchan hmuhnawmna a keng tel \hin.
Cassius-a’n Brutus hneh tuma \anhmun a khawh laia Brutus-a lo indan dan te, Act
IV, Scene III-a Cassius-a leh Brutus-a inhnialna \awngkam kan hmuh te hian an
inkarah buaina thlen mai thei khawpin a sosang a, Cassius-a’n “Chu, thamna
ei-ah min puh a ni maw? Nang Brutus-a hian chutiang thute I sawi ngam a maw?”
(92) a han ti te hian inthurualte inkara inhmuhthiam lohna chuan buaina lian
zawk rawn thlen mai tur angin minkawh hmuh a. Heng hian lemchan thawnthuah
rilru pekna a thlan \hin a ni.
Tin, Brutus-a rilru insual buai vel
kan hmuhte pawh hian he thawnthu hi a ti ngaihnawm hle. “A thih zawng a \ul
ngang a ni e. Keima chungchangah chuan demna chhet> pawh ka nei lo, mahse
mipui chungchangah chuan demawm a nih hi” (Act II, Scene I, 28) “|hian \ha anga
lang nazawng hi an \ha vek si \hin lova. Aw Caesar, Brutus-a hian a ngaihtuah
\hin teh che sin aw!” (Act II, Scene II, 50) tia a sawi te hian a rilru
chhungrila indona awm chu min hmuh tir thei.
Tin, Anthony-an Caesar-a vuinaa a
thusawite hian mipuite thinlungah buaina a rawn thlen a. A thusawi hmalam
mipuite rilru leh Brutus-a te vengthawng chung sia a han sawi te, chumi hnulama
mipuite rilru hneh tura a sawi dan leh thil tih te hian buaina a rawn siam thut
a. Heng hian lemchan thawnthu ngaihnawmna thuk tak an keng a. March ni 15-a
aienthiamin fimkhur tura a chahna leh khaw awmdan te hian harsatna lo thleng
tur atana a thlirtute ngaihdan leh lo dawnsawn dan turah ngaihtuahna tam tak a
nei tir a. Heng hi lemchan thawnthu a tih ngaihnawm avangin Aristotle-a pawhin
a ngaihpawimawh ber te zinga mi a ni nghe nghe.
IV.
Tragic Flow in Julius Caesar
Lemchana a changtu pawimawhte chunga
chhiatna lo thleng, an thil tih sual avanga an tawrhna hi tragic flow kan tih
chu a ni. Hei hi William Shakespeare-a hian a hmang rim hle. A lemchan thawnthu
ziak tam taka a changtu ber te hi an chunga chhiatna thlentu an ni fo \hin. Hei
hi Greek tragedy-a an ngaihpawimawh tak pakhat a ni bawk.
He lemchanah hian Caesar-a chunga
thihna lo thleng hi a nun danin a zir loh vang a theng niin a lang a, chutiang
bawkin Brutus-a leh a \huihhtruaite chunga thihna lo thleng te pawh an thil tih
dik loh rah a ni ve thei bawk ang.
Greek tragedy kal hmang a\anga tehin he lemchanaha
chhiatna lo thleng hi hamartia kan ti thei ang. Harmartia chu a changtuin a
chapona avang emaw, mahni inrin lutukna vang emaw a thutluna a siam sual avanga
chhiatna lo thleng hi a ni a. “Grik
tragedy-a hamartia chu anmahni thil tihsualin a hrin chhuah hubris or
tragic flow a ni a; chu chu chapona te, mahni inrin lutukna te leh thu tluna
siam sual avanga miin ke a chheh sualna ang chi sawi nan an hmang \hin”
(Literature Kawngpui, 164) Julius Caesar hian a thil tihsual leh a tlin lohna
hmu lova, a chhunga chhiatna lo thleng mai thei pawh chu hai derin thu tlukna a
siam sual a. A tawpah chuan thihna a rawn thleng ta tih kan hmu a. Hetia a inhriat
lohna avanga thutlukna dik lo siam avanga a chunga chhiatna lo thleng kha
hamartia chu a ni.
Caesar-a chunga chhiatna lo thleng
tur hi a rorelna hruaitu pui ten amah an rintawk lohna vang a ni a. A nupui
Culpurnia-i'n kal lo tura a ngen lawp lawpna chu “Mi dawizepte tihmualpho nana
pathiante thiltih a nih chu, vawiinah hian Caesar-a chu a hlauh vanga ama ina a
tawmim teh chuan ramsa, lung nei lo ang chuah chu a ni ngei ang” (Act II, Scene
II, 46) tiin mahni inringtawk takin a
hnial a. A tawpah chuan, “Ka kawrfual kha min han pe teh, ka kal dawn” (49)
tiin thihna chu a pan ta tih kan hmu. Hei hi aamh a inrinna avanga a tawn, a
chunga chhiatna chu a ma tawn buak ngei anih zia tichiangtu a ni.
V.
Protagonist Debate
Lemchana a changtu ber, hmun
pawimawh ber luahtu leh a thawnthu laimu tarlanna atan mi pawimawh ber hi
protagonist chu a ni a. “Protagonist chu lemchana a role pawimawh ber changtu, a
plot pawhin an mamawh leh chuta \anga \hen hran theih loh, a pumpui thua lak
pawha inzial tel tlat” (Class Note, 2) tiin sawifiahna a awm bawk. Julius Caesar lemchan thawnthuah hian a changtu ber
chungchangah inhnialna a tam hle a. A lemchan thawnthu kengtu Julius Caesar hi
a ni tih an awm laiin Brutus-a hi protogonist nihna pe pawh an awm ve bawk.
Amaherawhchu Caesar-a ber erawh Act III, Scene I ah a boral ta daih sia hian
inhnialna a ti tam niin a lang.
Julius Caesar lemchan thawnthua a
changtu ber protagonish ni a lang chu, he lemchan hming neitu Julius Ceasar hi
a ni. A nih theih dan chhan hrang hrang lo en dawn ila.
He lemchan hi thawnthu lungchhiat thlaka tawp chi
tragedy kan tih ang kha a ni a. Tragedy lemchan reng reng, classical Tragedy
a\ang tawhin lemchana a changtu ber te hming hmangin lemchan thawnthu hi hman a
ni \hin. He lemchanah pawh hian Julius Caesar hi a changtu pawimawh ber a nih
avangin leh a thawnthu laimu kengtu anih vangin a lemchan bu hming pawh a chawi
a, a chungah chhiatna a thleng a. A tawp thlengin lang lo mah se mi pawimawh
ber a ni.
A hmasa lamah kan sawi tawh zinga lemchan ruangam
indin chhoh dan kal hmang (elements of drama)ah khan harsatna lo inmung chho
\an a\angin a vawrhtawp a lo thlen thleng khan Ceasar-a kan hmu a. He lemchanin
a tawn san lai ber thlenna chu Caesar-a chungah hian a ni. Tin, buaina lo
chhuah chhan ber amah a nih avangin chu thihna chingfel tur chuan a chhan a
rawn lang a, chu chu Caesar-a chhunga phiarrukna lo awm ta kha a ni. A chhan
chu engpawh lo nise he lemchana hmun pawimawh ber leh lemchangtu dang, amah
phiarrutu te chunga thihna thlen chhan zawng zawng kha Caesar-a vang a ni bawk.
Act III thleng chauh amh hi lo lang mah se a
hnulama lan zawng zawngah a chanchin leh hming chuan hmun a luah a. Thawnthu
ruangam khai dingtu leh thil thleng zawng zawng innghahna bul ber a ni.
He lemchanah hian Caesar-a leh Brutus-a hi \hian
\ha leh inhmangaih tak an nih zia kan hmu chiang hle a. Brutus-a hi
Caesar-a rin leh \hian \ha, a hmangaih em em a ni a, mahse hetia Caesar-a
thattu zinga a tel ve mai hi Cassius-a’n a hneh vang bakah Act III Scene II a
Caesar-a an thah hnua mipui zinga a thusawi a\ang hian Brutus-a dik tak Ram
hmangaihtu chu a hmuh theih awm e,
Caesar-a \hian chuan engvanga
Brutus-a hi Caesar-a laka hel nge a nih a hriat duh chuan, hei hi ka chhanna
chu a ni e, Caesar-a ka hmangaihna hi a tlem vang ni hauh lovin Rome ka
hmangaih zawk vang chauh a ni e. Caesar-a chu nung dama a awm a, Rome mite chu
sal thiha an thih zawh vek ai chuan Caesar-a chu a boral a, Rome mite chu zalen
taka an nun hi a hlu zawk hle lo vem mi? (70)
Hei hian an mizia leh ngaihdan a inperhsan zia a ti
chiang viau. Brutus-a hian Rom hmakhua ngaiin Caesar-a; a \hian \ha leh a
hmangaih chu a that ta tih kan hria a. A tawpa Brutus-a \awngkamah chuan, “Caesar, tunah chuan thlamuang takin awm tawh
rawh le. Hetia mahni ka inthat hi, nang ka that che ai khan a letin ka chak
zawk a sin” (Act V. Sence V, 129) tiin a sawi a. Hei hian an in\hian\hatna a
sawifiah rualin Brutus-a khan a nunna aiin Rom a hmangaih tih kan hmu tel thei
bawk ang. Tin, chung zawng aia pawimawh chu hei hian Caesar-a nihna leh dinhmun
a ti chiang a, he lemchan tawp thleng hian a huhang hian a chim vek a, a thih
dawn darkarah pawh Brutus-a hian Caesar-a hi a la lam fan a, amah lang lo mah
se a pawimawh zia chiang takin kan hmu thei. Thil zawng zawng thlenna chhan hi
amah a ni a, hmun pawimawh ber luahtu a ni a, protagonist nih hi a phu ber niin
a lang.
Caesar-a thahna tur kawnga a
mei-zang-hlaptu Cassius-a meuh pawhin a thih dawn darkarah chuan, “Caesar,
nangmah thattu ngunhnam ngei khan i phuba a la ta e” (119) tih a sawi a. Chu
thihna chu Brutus-a’n a han hmuh chuan, “Aw Julius Caesar, i va la han chak teh
cheu ve le! I thlarau chu vak velin kan ngunhnam ngei chu kan hnuk chattuah i
\antir thei tlat mai le!” (122) a ti thlawt mai a. Hei hian Caesar-a huhang
chuan a fan hneh zia leh a thlarau chuan la chenchilh ang hialin an ngai tih
kan hmu thei a. Heng zawng zawng a\ang hian Caesar-a hi he lemchan mi pawimawh
ber leh khai dingtu, protagonist chu a ni tih kan sawi thei ang.
**********************
Works Cited
Laldinmawia, H. Literature Lamtlung, Aizawl:
Creativenture, Pune, Maharastra, 2015. Print
Lalrawna, R. Julius Ceasar, Trans. William
Shakespere. Aizawl; Merryland Bool House, Bungkawn. Print
Vannghaka, K.C., Literature Kawngpui, Aizawl: Vanhlupuii,
Bawmhkawn, 2010. Print.
Bibliography
Laldinmawia, H. Literature Lamtlung, Aizawl:
Creativenture, Pune, Maharastra, 2015. Print
Lalrawna, R. Julius Ceasar, Trans. William
Shakespere. Aizawl; Merryland Bool House, Bungkawn. Print
Lalzuithanga, F. Laisuih, Aizawl: Mizoram Publication
Board, 2015. Print
Thangvunga, R. Theory of Literature,Aizawl:
Department of Mizo, MZU, 2013. Print
Vannghaka, K.C., Literature Kawngpui, Aizawl: Vanhlupuii,
Bawmhkawn, 2010. Print.
Web Source Format:
Mabillard, Amanda. “Julius
Caesar Character Introduction.” Shakespeare Online. 20 Aug. 2000. Web. 2nd
June 2015
Mabillard,
Amanda. The History and Context of "Et tu, Brute?".. Shakespeare Online. 20 Aug. 2006.
Web. 3rd June 2015
Roth, Helen
M. Shakespeare’s Julius Caesar. Shakespeare Online. 20
Nov. 2010. Web. 3rd June 2015
Other Source
Class
Note.
No comments:
Post a Comment